Serbıa Prezıdenti Astanaǵa saparyn asyǵa kútetinin aıtty.
Kelissózder barysynda jahandyq jáne aımaqtyq qaýipsizdik máseleleri de qozǵaldy, dep habarlaıdy aqshamnews.kz Aqordaǵa silteme jasap.
«Qazaqstan men Serbıa halyqaralyq jáne óńirlik deńgeıde tyǵyz baılanys ornatqan. Kóptegen ózekti másele boıynsha ustanymdarymyz – ortaq. Qazirgi geosaıası jaǵdaı kúrdeli. Sol sebepti, biz yqpaldastyǵymyzdy odan ári kúsheıtýge múddeli ekenimizdi rastadyq», – dedi Memleket basshysy.
Qasym-Jomart Toqaev Aleksandr Výchıchti kelesi jyly Qazaqstanǵa resmı saparmen kelýge shaqyrdy.
Serbıa Prezıdenti aýqymdy máseleler qozǵalǵan búgingi kelissózderdiń nátıjeli ári mazmundy sıpatta ótkenin jetkizip, kezdesýlerge joǵary baǵa berdi. Sondaı-aq memleketter men prezıdentter arasynda ózara senimge negizdelgen qarym-qatynas ornaǵanyn rızashylyqpen atap ótti.
«Qazaqstan men Serbıa arasyndaǵy dostyq halyqtarymyzdyń yntymaqtastyǵymen ǵana shektelmeıdi. Biz halyqaralyq uıymdarda, sonyń ishinde BUU aıasynda bir-birimizge ózara qoldaý kórsetemiz. Búgin ártúrli salada birqatar kelisimge qol jetkizildi. Sonyń negizinde eki eldiń túpkilikti múddelerine saı keletin birlesken jobalar júzege asyrylatyn bolady. Men dosym, Qazaqstan Prezıdenti Qasym-Jomart Toqaevqa Serbıamen yqpaldastyqty nyǵaıtýǵa qosqan eleýli úlesi úshin shynaıy alǵysymdy aıtamyn», – dedi Aleksandr Výchıch.
Brıfıń sońynda Serbıa Prezıdenti Astanaǵa saparyn asyǵa kútetinin jáne Memleket basshysyn Belgradta taǵy da qarsy alýǵa daıyn ekenin jetkizdi.