Ár qazaqtyń úı sharýasy úshin taptyrmas quralyna aınalǵan kir sabyndy rasymen kópshilik túrli jaǵdaılar úshin paıdalanady. Kez kelgen qazaqtyń úıinen tabylatyn dál sol sabyndy qarapaıym aýyl otbasy óndiredi desem sener me edińiz? Aqshamnews.kz tilshisi Almatyǵa jaqyn aýylda qoldan sabyn jasap, kásibin dóńgeletip otyrǵan qazaq otbasymen tildesip qaıtty.
Kásip qalaı bastaldy?
Qasen men Aınur Týndebaevtar - Almaty oblysy, Besaǵash aýylynyń turǵyndary. Aınur hanym mektepte qarapaıym aspaz bolyp qyzmet atqarady. Al Qasen aǵa - temirden túıin túıgen dánekerleýshi sheber. Olar byltyrdan beri óz aýylynda kir sabyn óndirip kásip qylyp otyr.
"Osydan bir jyl buryn joldasym kir sabyn jasap, satyp kóreıik dep usynys tastady. Ol kisi ózi sondaı eńbekqor adam. Jazdygúnderi dánekerleýmen aınalyssa, qysta bos jatqysy kelmeıdi. Solaısha osy kásipti bastap kóreıik dedi. Shyny kerek, basynda senbegen edim. "Qalaı jasaımyz?", "kim alady?" degen suraqtar boldy. Biraq keıin táýekel etip, sabyn jasaýdyń qupıasyn oqyp, joldasym ózi apparattar satyp alyp, bastap kettik", - deıdi Aınur Týndebaeva.
Qazir qarapaıym aýyl januıasynyń ónimine suranys ta, qyzyǵýshylyq ta artyp keledi. Aınur hanymnyń aıtýynsha, onyń kir sabynynyń ereksheligi sapasynda eken.
Tońmaı qalaı kir sabynǵa aınalady?
Aınur hanym "erekshe sapadaǵy" kir sabynnyń neden, qalaı jasalatynyn áńgimelep berdi. Onyń júıeli túrde jasalatyn qupıa quramy da bar eken.
"Eń birinshi kádimgi maldyń ishmaıyn alyp qazanda qaınatamyz. Qaınatylǵan maıdy bóshkege quıyp, túrli hımıkattar aralastyryp, hosh ıistendirip kesýge daıyndaımyz. Artynsha apparatqa salyp, ony qalypqa keltiremiz. Kepkenin kútemiz de, ary qaraı qoraptarǵa salyp jınaı beremiz", - deıdi ol.
Aınur Týndebaevanyń sózinshe, kópshilik sabyndy qandaı maıdan jasaıtynyn suraıtyn kórinedi.
"Menen kóbi "neniń maıynan jasaısyzdar, shoshqa emes pe?" dep suraıdy. Biz musylmanbyz. Eshqandaı da shoshqa emes, kádimgi sıyrdyń, qoıdyń tońmaıynan osyndaı dúnıe shyǵaryp otyrmyz", - deıdi kásip ıesi.
Nakoni, Bakoni: sabyndar nege erekshe atalǵan?
Aınur hanym hosh ıisti kir sabyndarǵa Nakoni, Bakoni degen ataý bergen. Ol ony egiz uldary Nurdáýlet pen Baqdáýlettiń esimderimen ataǵan.
"Bul ónim bolǵandyqtan oǵan ataý berý kerek boldy. Basynda aǵylshynsha soap-sabyn dep qoıǵanbyz. Keıin bir týysymyz aǵylshynsha emes, qazaqsha qoısańdarshy degen soń, uldarymnyń esimimen atadym. Nurdáýletti Nakonı, Baqdáýletti Bakonı dep erkeletemiz. Qazirgi kásip te sol uldarymnyń nesibesi" , - deıdi Aınur Týndebaeva.
Eki túrli ataýmen shyǵatyn Nakoni men Bakoni bir-birinen quramy boıynsha sál ǵana ózgeshe. Bireýi jupar ıisti bolsa, endi biri taza turmystyq sharýaǵa arnalǵan.
"Biz ózimiz osy kir sabyndy bárine paıdalanamyz. Shomylsań da, bas jýsań da, ydys tazalasań da aınadaı qylyp beredi. Ózimiz sapasyna kepildik bergendikten ǵana saýdalap otyrmyz", - deıdi kásip ıesi.
"Keleshekte úlken sehqa aınalsaq deımiz..."
Aýyl kásipkerleri keleshekte óz óndirisin ulǵaıtýdy josparlap otyr. Qazir qolmen jasalyp jatqan kir sabyn óndirisin júıeli jolǵa qoıý úshin arnaıy seh ashý josparda bar.
"Bolashaqta osy kásibimizdi úlken sehqa aınaldyrǵymyz keledi. Qazirdiń ózinde suranys kóbeıip keledi, turaqty klıentterimiz bar. Eger keńirek ǵımarat bolsa, qosymsha adamdardy da jumysqa alyp, ónim túrlerin kóbeıtýdi kózdep otyrmyz. Bul – meniń ǵana emes, otbasymnyń ortaq eńbegi men armany", – deıdi Aınur Týndebaeva.
