FlyArystan áýe kompanıasy Heart Center Foundation qoǵamdyq qorymen seriktestikti keńeıtip, óńirlerdegi dárigerlerdiń kásibı biliktiligin arttyrý men tájirıbe almasýǵa, sondaı-aq týa bitken júrek aqaýy bar (TJA) naýqastardy qoldaýǵa baǵyttalǵan bilim berý bastamalary aıasyndaǵy yntymaqtastyqty jalǵastyrýda.
Búgin Almaty qalasynda UMC (University Medical Center) Júrek ortalyǵy mamandarynyń qatysýymen «Pasıentter mektebi» jobasy sheńberindegi kezekti kóshpeli oqytý sesıasy ótti. FlyArystan áýekompanıasy Astanadan balalar kardıologtary men kardıohırýrgtarynyń ushýyn qamtamasyz etip, dárigerler men TJA-men aýyratyn balalardyń ata-analaryna arnalǵan birqatar dárister men praktıkalyq sheberlik sabaqtarynyń ótýine qoldaý kórsetti. Bul shara ata-analarǵa jetekshi hırýrgtarmen jeke kezdesip, konsýltasıa alý múmkindigin usyndy.
Rıchard Ledjer, FlyArystan AQ prezıdenti:
«Heart Center Foundation qorymen seriktestik 2024 jyldyń kúzinde bastaý alyp, bizdiń uzaq merzimdi áleýmettik strategıamyzdyń mańyzdy bóligine aınaldy. Biz bul yntymaqtastyqty bir rettik bastama retinde emes, Qazaqstandaǵy densaýlyq saqtaý júıesiniń damýyna naqty áser ete alatyn turaqty baǵyt retinde qarastyramyz. Ótken jyly FlyArystan Qostanaı, Qyzylorda, Oral jáne Aqtaý qalalarynda dárigerlerge arnalǵan oqytý sesıalaryn ótkizýge qoldaý kórsetti. Osylaısha seriktesterge tájirıbe almasý men júrek-qantamyr aýrýlaryn emdeýdiń zamanaýı tásilderin engizý alańyn qurýǵa múmkindik berdi. Óńirler men adamdardy baılanystyratyn áýekompanıa retinde biz qoǵamnyń damýyna óz úlesimizdi qosýǵa jáne alǵa birge qadam basýǵa umtylamyz».
Praktıkalyq sheberlik sabaǵy barysynda UMC Júrek ortalyǵynyń mamandary júrek yrǵaǵynyń aýytqýlary men aýyr deńgeıdegi júrek aqaýlary bar balalardy tekserip, qorytyndylar jasap, nátıjelerdi taldaý kezindegi kúrdelilikterdi túsindirdi. Balalar kardıology Aıkerim Janatqyzy júktilik kezindegi tekserýlerdiń mańyzdylyǵyna toqtalsa, Tatána Ivanova-Razýmova – týa bitken júrek aqaýy bar balalarǵa ata-analyq kútim kórsetý erekshelikteri týraly baıandady.
Murat Zaýyrov, Heart Center Foundation qorynyń dırektory:
«Aqtaýda ótken “Pasıent mektebi” jobasynyń nátıjeleri mundaı bilim berý bastamalarynyń ata-analar men medısınalyq qaýymdastyq úshin qanshalyqty mańyzdy jáne qajet ekenin kórsetti. Mundaı kezdesýler aýrýdyń erekshelikterin jaqsy túsinýge kómektesip, ýaqtyly kómekke júginýge yntalandyrady. Bizdiń mindetimiz – dárigerler men qoǵam arasyndaǵy baılanysty qamtamasyz etip, mańyzdy medısınalyq aqparatty barynsha qoljetimdi etý. Biz bul baǵyttaǵy jobalardy jalǵastyrýǵa múddelimiz jáne FlyArystan kompanıasyn – ár óńirdegi dárigerler men pasıentter úshin bilim berý bastamalarynyń qoljetimdi bolýyna yqpal etetin senimdi seriktes retinde kóremiz».
2025 jyldyń qazan aıynda ekologıa, áleýmettik jaýapkershilik jáne korporatıvtik basqarý salalaryndaǵy strategıalyq maqsattarǵa jetýge úles qosqan Air Astana tobynyń seriktesterin marapattaıtyn ESG Awards saltanatty rásimi ótti. Bıylǵy jyly 11 kompanıa laýreat atandy. Olardyń qatarynda óńirlik densaýlyq saqtaý júıesiniń turaqty damýyna qosqan úlesi úshin Heart Center Foundation qory da marapattaldy.
FlyArystan týraly:
FlyArystan – Air Astana tobynyń 100% enshiles kompanıasy bolyp tabylatyn qazaqstandyq loýkoster. Ol óz qyzmetin 2019 jyldyń mamyr aıynda bastady. 2025 jyldyń qańtar aıynan bastap FlyArystan óz eksplýatant sertıfıkatyn alyp, FS kody boıynsha táýelsiz áýekompanıa retinde qyzmet kórsetýde. Áýekompanıa Almaty, Astana jáne Aqtaý qalalarynda ornalasqan bazalaryndaǵy zamanaýı A320 ushaqtarynan quralǵan áýe parkimen reıster oryndaıdy. FlyArystan keń aýqymdy marshrýttar jelisi ishki jáne halyqaralyq reısterdi, sondaı-aq charterlik baǵyttardy qamtıdy. FlyArystan 2023, 2024 jáne 2025 jyldary úsh ret Skytrax World Airline Awards tarapynan Ortalyq Azıa jáne TMD-nyń eń úzdik búdjettik áýekompanıasy dep tanyldy.
Heart Center Foundation týraly:
Heart Center Foundation qoǵamdyq qory – densaýlyq saqtaý salasyndaǵy jobalardy iske asyratyn Qazaqstandaǵy alǵashqy endaýment-qor. Qordyń mısıasy – ǵylymdy, bilim men aǵartýdy biriktire otyryp, Qazaqstanda kardıohırýrgıalyq jáne kardıologıalyq qyzmetti damytýǵa yqpal etý. Qordyń quryltaıshylarynyń biri – University Medical Center basqarma tóraǵasy, dáriger kardıohırýrg, medısına ǵylymdarynyń doktory, QR UǴA akademıgi Iýrıı Vladımırovıch Pá.