Qazaqstannyń eńbek sińirgen qaıratkeri, belgili ánshi Tolqyn Zabırova Jańa jyldy qarsy alýdaǵy otbasylyq dástúrleri men balalyq shaqtan qalǵan estelikterimen bólisti.
– Jańa jyl – bul otbasy merekesi. Sondyqtan men ony jaqyndarymmen, anammen, joldasymmen jáne úsh balammen birge qarsy alýdy jón kóremin. Bul men úshin erekshe sát, óıtkeni Jańa jyldy otbasymmen birge ótkizý – baǵa jetpes qýanysh, – deıdi ánshi.
Burynǵy jyldary merekelik keshter men konsertter ánshini otbasynan jyraqta ótkizýdi talap etken eken.
– Balalarym kishkentaı bolǵan kezde Jańa jyl túnin merekelik is-sharalarda ótkizýge týra keletin. Biraq ýaqyt óte kele, otbasynyń mańyzdylyǵy arta tústi. Qazir mundaı usynystardan bas tartyp, bar nazarymdy jaqyndaryma aýdarýǵa tyrysamyn, – dep bólisti ol.
Jańa jyldyq dastarqannyń ereksheligi
Tolqyn Zabırova Jańa jylda otbasylyq dastarqannyń erekshe oryn alatynyn atap ótti.
– Jańa jyldyq dastarqan – otbasymyzdyń mańyzdy dástúri. Biz árdaıym ádemi ári mol dastarqan jasaýǵa tyrysamyz. Bizdiń úıde er adamdar kóp bolǵandyqtan, taǵamdardyń alýan túrliligi mańyzdy. Ásirese, kúıeýim men kishi ulym kúrketaýyq etin jaqsy kóredi. Sondyqtan Jańa jylda kúrketaýyq pisirý – bizdiń otbasy dástúrimiz, – deıdi ánshi.
Balalyq shaqtan qalǵan jarqyn estelikter
Tolqyn Zabırova óziniń balalyq shaǵynda Jańa jyldy qarsy alý sátterin saǵynyshpen eske aldy.
– Bizdiń balalyq shaǵymyz búgingi balalardyń ómirinen áldeqaıda qarapaıym boldy. Biraq sol shaǵyn qýanyshtar bizdi baqytty etetin. Ásirese, Jańa jyl qarsańynda jertóleden alma alyp shyǵý erekshe estelik. Biz baqshamyzda ósirgen almalardy gazetterge orap, jertólege saqtaıtynbyz. Al sol almalardy mereke kúni alyp shyqqanda, olardyń hosh ıisi úıdi keremet jylýlyqpen toltyratyn. Bul balalyq shaqtyń eń jarqyn sátteriniń biri edi, – deıdi ol.
Jańa jyldyq tilek
Tolqyn Zabırova barsha qazaqstandyqtardy Jańa jyl merekesimen quttyqtady:
– Jańa jyl – bul jańa úmitter men armandarǵa toly erekshe mereke. Barshańyzǵa baqyt, densaýlyq, bereke tileımin. Ár otbasynyń shańyraǵy shattyqqa tolsyn. Elimizde tynyshtyq pen kelisim ornap, árbir adamnyń júreginde meıirim men ózara túsinistik saltanat qursyn. Jańa jyl tek jaqsylyq ákelsin! – dep túıindedi ánshi.