20-28 qarasha kúnderi álem birinshiligi ótedi
2022 jyldyń 20 qazan kúni Astana qalasynda Qazaqstan Respýblıkasy Ulttyq sport túrleri qaýymdastyǵy men Dúnıejúzilik toǵyzqumalaq federasıasy arasynda áriptestik týraly memorandýmǵa qol qoıý rásimi ótti, dep habarlaıdy Almaty-akshamy.kz.
Memorandým aıasynda qazaqstandyq toǵyzqumalaq federasıasynyń Ulttyq sport túrleri qaýymdastyǵyna qosylýy týraly habarlandy. Sondaı-aq, eki uıym arasyndaǵy áriptestik toǵyzqumalaqty damytýdy, salaýatty ómir saltyn qalyptastyrý boıynsha naqty is-sharalar josparyn ázirleýdi kózdeıdi.
Saltanatty rásimge Ulttyq sport túrleri qaýymdastyǵynyń prezıdenti Islambek Saljanov pen Dúnıejúzilik Toǵyzqumalaq Federasıasynyń prezıdenti Álıhan Baımenov qatysty.
«Búgin qol qoıylatyn qujattyń mánisi – Toǵyzqumalaq federasıasy Ulttyq sport túrleri qaýymdastyǵyna qosylady. Endi birlese otyryp, ultqa paıdaly talaı jobalardy júzege asyramyz dep oılaımyn. Bul kezdesý – ulttyq sport salasyndaǵy úlken ózgeristiń basy. Bilimdi, aqyldy, parasatty jastar – ult bolashaǵy. Al toǵyzqumalaq oıyny – jas urpaqqa ushqyr oılaýdy, strategıalyq josparlaýdy jáne tabandylyqty úıretedi», - dedi Islambek Saljanov.
Óz kezeginde Dúnıejúzilik toǵyzqumalaq federasıasynyń basshysy Álıhan Baımenov bul basqosýdyń toǵyzqumalaqty damytýdaǵy mańyzyn atap ótti:
«Ulttyq sport túri retinde toǵyzqumalaqty damytý eki uıymnyń da maqsatyna kiredi. Al osy iste kúsh biriktirip, is-qımylymyzdy, sharalarymyzdy úılestirip ótkizýden, bir-birimizge qoldaý kórsetýden utatyn – toǵyzqumalaq», - dedi ol.
Taraptar qarasha aıynda Aqtóbede ótetin toǵyzqumalaqtan 6-shi álem chempıonyn abyroımen ótkizý kerektigine toqtaldy. Ulttyq sport túrleri qaýymdastyǵynyń prezıdenti Islambek Saljanov dodaǵa qazaqstandyq sportshylardyń daıyndyǵyn jetildirý qajettiligine toqtaldy.
20-28 qarasha kúnderi ótetin álem birinshiligine Ulybrıtanıa, Chehıa, Germanıa, Latvıa, AQSH, Kolýmbıa, Antıgýa men Barbýda, Úndistan, Efıopıa, Rýmynıa, Ýkraına, Reseı, Qytaı, Túrkıa, Mońǵolıa, Ózbekstan, Qyrǵyzstan, Túrikmenstan, Tájikstan, Ázerbaıjan men Moldovadan 80-ge jýyq sportshy qatysady dep kútilýde.
Toǵyzqumalaq — qazaqtyń ulttyq dástúrli oıyndarynyń biri. Toǵyzqumalaq týraly alǵashqy málimetter aýyz ádebıetinde kezdesse, búgingi kúnge onyń tasqa qashalǵan beınesi jetti. Elimizde toǵyzqumalaqpen aınalysatyndar sany 200 myńnan asty, onyń 9 myńdaıy – kásibı sportshy.
Aıta keteıik, Ulttyq sport túrleri qaýymdastyǵynyń basshylyǵy aýysyp, I.Saljanov qaýymdastyq prezıdenti laýazymyna saılanǵaly beri qaýymdastyq jumysy jandana tústi.
Qazir Ulttyq sport túrleri qaýymdastyǵynyń quramynda Kókpar, Jamby atý, Aýdaryspaq, Teńge ilý, Báıge, Sadaq atý sıaqty federasıalar bar.
Qaýymdastyqtyń uıymdastyrýymen osy jyldyń qyrkúıek aıynda elimizdiń 19 óńirinen 95 shabandoz qatysqan «Uly Dala Joryǵy» marafon-báıgesi ótkizildi.
Ótken aptada Ulttyq sport túrleri qaýymdastyǵy uıymdastyrýymen Jańaózen qalasynda Dástúrli sadaq atýdan tuńǵysh respýblıkalyq chempıonat ótti.