Qazannyń altysy kúni pedagogtardyń quryltaıy ótedi.
Bilim salasyndaǵy yntymaqtastyq máselelerin TMD-ǵa múshe elder ókilderi talqylady. QR Oqý-aǵartý mınıstri Asqat Aımaǵambetovtiń tóraǵalyǵymen Bilim berý salasyndaǵy keńes otyrysy ótti. Oǵan Belarýs, Tájikstan, Reseı Federasıasy, Qyrǵyzstan, Armenıa elderiniń ókilderi qatysty, dep habarlaıdy Almaty-akshamy.kz.
Kún tártibinde otyrysqa qatysýshylar TMD-ǵa múshe memleketterdiń bazalyq uıymdary qyzmetin damytý, bilim sapasyn qamtamasyz etý, bilikti mamandardy daıarlaý, ulttyq attestasıa júıelerin damytý máselelerin qarady. Sondaı-aq Keńes músheleri bilim salasy qyzmetkerlerin «Táýelsiz Memleketter Dostastyǵynyń bilim berý isiniń úzdigi» tósbelgisimen marapattaý týraly sheshim qabyldady.
«Erteń TMD-ǵa múshe memleketter muǵalimderi men bilim berý salasy qyzmetkerleriniń VII sezi ótedi. TMD elderiniń úzdik pedagogteriniń sheberlik sabaqtary ótedi. Sondaı-aq tájirıbe almasý alańdary uıymdastyrylady. Sıeze TMD elderindegi bilim salasynyń damý bolashaǵyn, qandaı ózgerister men jańalyqtar engizilip jatqanyn talqylap, qarar qabyldaımyz. Sıezi tájirıbe almasý alańy retinde qarastyrý kerek. Áriptesterimizben bilim salasyndaǵy yntymaqtastyqty odan ári qalaı damytatynymyzdy talqylaımyz», - dedi Oqý-aǵartý mınıstri Asqat Aımaǵambetov.
Pedagogter sezi TMD elderi bilim mınıstrleri konferensıasynyń sheshimimen eki jylda bir ret ótkiziledi. Sıez aıasynda İİ Pedagogıkalyq sheberlik festıvaliniń qorytyndy kezeńi ótip, baıqaýdyń fınalısteri, ıaǵnı TMD elderiniń muǵalimderi elimizge keledi. Olar saıys sabaqtaryn kórsetedi. Muǵalimderge arnalǵan sheberlik sabaqtary úsh nomınasıa boıynsha ótedi: muǵalim, tárbıeshi jáne psıholog/áleýmettik pedagog.
«QR Oqý-aǵartý mınıstrligi festıváldi osymen ekinshi ret qatarynan uıymdastyryp otyr. Syrttaı ótken kezeńniń qorytyndysy uıymdastyrý komıteti men qazylar alqasynyń birlesken otyrysynda belgili boldy. Festıváldiń dástúrli formattaǵy kezeńi erteń bastalady. 50 úmitkerdiń arasynan iriktelip alynǵan úzdik 35 muǵalimniń sheberlik sabaqtary erteń ótedi. TMD-ǵa múshe elderdiń bilim jáne ǵylym mınıstrlikteriniń usynystary negizinde ǵylymı zertteýler baǵdarlamalarynyń jobalaryn ázirleý, TMD-ǵa múshe memleketterdiń ǵylymı jáne ǵylymı-pedagogıkalyq kadrlaryn atestattaýdyń ulttyq júıelerin damytý jónindegi jumys toby quryldy. Sondaı-aq TMD-ǵa múshe elderdiń ǵylymı dárejeleri týraly qujattardy ózara taný týraly kelisim jasaldy», - dedi Y.Altynsarın atyndaǵy Ulttyq bilim akademıasynyń prezıdenti Mádına Tynybaeva.
Sıeze mektepke deıingi jáne orta bilim berý salasyndaǵy sıfrlyq jáne baspa ónimderiniń kórmesi uıymdastyrylady. Qazaqstandyq kásipkerler, startaptar oqý úderisin tıimdi uıymdastyrýǵa baǵyttalǵan IT-jobalaryn tanystyrady.
Sıez Táýelsiz Memleketter Dostastyǵyna múshe memleketterdiń gýmanıtarlyq yntymaqtastyǵynyń memleketaralyq qory qoldaýymen ótedi.