Keshendi is-sharalar sheńberinde halyqty jáne ınfraqurylymdy kóktemde ózenderdiń arnasynan asýyna baılanysty qaýipterden qorǵaýǵa baǵyttalǵan sý tasqynyna qarsy kóptegen is-sharalar júzege asyrylýda.
Sý tasqynynyń yqtımal saldaryn boldyrmaý maqsatynda jergilikti atqarýshy organdar tótenshe jaǵdaılar departamentterimen birlesip qorǵanys bógetteri men bilikterin turǵyzý jáne nyǵaıtý, sý burý arnalary men aryqtardy qurý, sondaı-aq jańa nóser júıeleri men sý ótkizý qurylystaryn salý jónindegi jumystardy júrgizedi. Osy sharalardyń barlyǵy sý tasqynynan qorǵaý úshin senimdi ınfraqurylym qurýǵa baǵyttalǵan, dep habarlaıdy aqshamnews.kz sala mınıstrligine silteme jasap.
Budan basqa TJM qyzmetkerleri 2025 jylǵy sý tasqynyna qarsy is-sharalardy iske asyrý boıynsha barlyq óńirlerdiń daıyndyǵyna tekserý júrgizýde.
Qaraǵandy oblysynda sý tasqyny kezeńine daıyndyq jumystary aıaqtaldy. Barlyǵy 180 ınjenerlik is-shara júzege asyryldy. 65 km qorǵanys bógetteri men bilikteri turǵyzylyp, nyǵaıtyldy, ózender arnalarynyń 18-den astam km sý tasqyny qaýipti ýchaskelerine sanasıa júrgizildi, 26 km drenajdyq jáne sý burý júıeleri tazartyldy. Avtojoldardyń 75 ýchaskesinde sý ótkizý qabileti artty. Qazirgi ýaqytta oblysta materıaldyq-tehnıkalyq jáne qarjy qarajaty, JJM, azyq-túlik, ınertti materıaldar jáne qapshyqtar rezervi qalyptastyrylýda. Eldi mekenderden qar tazalaý jumystary jandandyryldy. Sý ótkizgish qubyrlaryn tazartý, kanaldar men transheıalardy kesý, sondaı-aq avtomatty tasqyn sý tógindilerin tazartý jumystary aqpan aıynda bastalady.
Aqtóbe oblysynyń halqy men aýmaǵyn sý tasqynynan qorǵaýǵa baǵyttalǵan is-sharalardy iske asyrýdy TJM tótenshe jaǵdaılardy joıý departamenti bastyǵynyń orynbasary Asylan Ýakıshev baǵalady. Jergilikti atqarýshy organdardyń ókilderimen Yrǵyz, Oıyl jáne Qobda aýdandary qaraldy. 2025 jylǵy sý tasqynyna daıyndyq maqsatynda ınjenerlik jumystar josparyn oryndaýǵa erekshe nazar aýdaryldy. Josparda sý tasqynyna qarsy 104 is-shara iske asyryldy, 31 is-shara iske asyrý satysynda.
Shyǵys Qazaqstan oblysy TJD jáne «Qazseldenqorǵaý» qyzmetkerleri «Qazavıaqutqarý» AQ «Mı-8» tikushaǵynda sý tasqyny qaýipti jáne kóshkin ýchaskelerine monıtorıń júrgizdi. Mamandar Glýbokoe aýdanyndaǵy ózenderinde muz keptelisteri men seńniń júrýin tekserdi. Aýdan aýmaǵyn tolyǵymen qar basqan. Aerovızýaldy monıtorıń sý tasqyny jaǵdaıynyń boljamyn barynsha tıimdi jasaýǵa múmkindik beredi. Qazirgi ýaqytta zerttelgen marshrýtta muz keptelisteri men seńniń júrýi baıqalmaıdy. Glýbokoe aýdanynda taýly aımaqtaǵy qar jamylǵysynyń bıiktigi 60 sm. Munda 26 kóshkin qaýpi bar oshaq bar. Jaqynda qaýipsizdik maqsatynda «Óskemen-Gornaıa - Úlbi-Severnoe» avtojolynyń ýchaskesinde kóshkinderdiń profılaktıkalyq túsýi ýaqtyly júrgizildi, nátıjesinde 2090 tekshe metr qar tústi.
Soltústik Qazaqstan oblysynyń halqy men aýmaǵyn sý tasqynynan qorǵaýǵa baǵyttalǵan is-sharalardyń iske asyrylýyn TJM Órtke qarsy qyzmet komıteti tóraǵasynyń orynbasary Qanat Dospaev qarady. Jergilikti atqarýshy organdardyń, «Qazsýshar» jáne «Qazgıdromet» RMM ókilderimen birlesip oblystyń Qyzyljar, Shal aqyn, Ǵ.Músirepov, Esil aýdandary men Petropavl qalasyn aralap shyqty. 2024-2025 jyldarǵa arnalǵan ınjenerlik jumystar josparyn iske asyrýǵa basa nazar aýdaryldy, onyń sheńberinde sý tasqynyna qarsy 90 is-shara oryndaldy, 19 is-shara boıynsha jumystar júrgizilýde.
Batys Qazaqstan oblysynda qorǵanys qurylystarynyń jaı-kúıine monıtorıń júrgizildi. Jaıyq ózeni sýynyń tasý qaýpi zertteldi. Sý tasqyny qaýipsizdigin qamtamasyz etý maqsatynda Terekti, Aqjaıyq, sondaı-aq Báıterek aýdandarynda Jaıyq ózeniniń boıynda ornalasqan qorǵanys bógetteriniń jaı-kúıine tekserý júrgizildi. Jumystar 2024 jylǵy ınjenerlik jumystar jospary sheńberinde oryndaldy. Zertteý qorǵanys qurylystarynyń jaı-kúıin turaqty baqylaýdyń jáne olardy tıisti jaǵdaıda ustaýdyń mańyzdylyǵyn atap ótti.
Jalpy sý tasqyny kezeńine daıyndyq boıynsha is-sharalar jalǵasýda jáne turaqty baqylaýda.