TikTok platformasy jasóspirimderdiń qaýipsizdigin arttyrý jáne ata-analardyń baqylaý múmkindikterin keńeıtý maqsatynda jańa fýnksıalardy engizetinin habarlady. Bul týraly Aqshamnews.kz saıty habarlaıdy.
Jańartýlar ata-analarǵa balalardyń TikTok-taǵy belsendiligin qadaǵalaýǵa, al jasóspirimderge qosymshada ótkizetin ýaqytyn basqarýǵa kómektesedi.
TikTok «Otbasylyq baptaýlar» bóliminde ata-analarǵa jasóspirimderdiń qosymshaǵa qoljetimdiligin belgili bir ýaqyt aralyǵynda shekteýge múmkindik beretin jańa fýnksıany iske qosýdy josparlap otyr. Sonymen qatar, platforma saǵat 22:00-den keıin TikTok qoldanýshylardyń nazaryn ekrannan alshaqtatyp, demalýyna kómektesetin arnaıy eskertýler qosýdy kózdeıdi.
TikTok-taǵy «Otbasylyq baptaýlardyń» jańa múmkindikteri
TikTok-ta ata-analardyń baqylaý júıesi engizilgenine bes jyl boldy. Osy ýaqyt ishinde platforma sarapshylardyń usynystaryn jáne ata-analardyń pikirlerin eskere otyryp, júıeni únemi jetildirip keledi. Jańa fýnksıalar ata-analarǵa kelesi múmkindikterdi usynady:
🔹 Balalarynyń TikTok qoldaný ýaqytyn shekteý (mysaly, oqý nemese uıqy ýaqytynda).
🔹 Belgili bir ýaqytqa qosymshany buǵattaý úshin «Demalys» fýnksıasyn paıdalaný.
🔹 Sıfrlyq detokst úshin qaıtalanatyn kesteni ornatý.
🔹 Balalarynyń TikTok-ta kimderdi baqylaıtynyn jáne olardyń akkaýnttaryna kimderdiń jazylǵanyn kórý.
🔹 Jasóspirimderdiń buǵattaǵan akkaýnttaryn baqylaý.
QR Mádenıet jáne aqparat mınıstri Aıda Balaeva jasóspirimderdiń onlaın qaýipsizdigi men aqparattyq keńistiktegi mádenıetti saqtaý máselesiniń ózektiligin atap ótti. Onyń aıtýynsha, balalardyń ınternettegi ýaqytyn baqylaý jáne olardy zıandy kontentten qorǵaý – memlekettiń basty mindetteriniń biri.
«Sıfrlyq dáýirde balalardyń ınternettegi qaýipsizdigi mańyzdy. TikTok sekildi platformalardyń ata-analar úshin jańa baqylaý múmkindikterin engizýi – oń ózgeris. Biz aqparattyq qaýipsizdik salasynda belsendi jumys istep, balalardy qaýipti kontentten qorǵaý sharalaryn kúsheıtemiz», – dedi Aıda Balaeva.
Bolashaqta TikTok qaýymdastyq erejelerine sáıkes kelmeıtin kontent týraly ata-analarǵa habarlaý múmkindigin engizýdi josparlap otyr. Bul jańashyldyq ata-analarǵa balalarynyń onlaın qaýipsizdigin tıimdi baqylaýǵa múmkindik beredi.