Amerıkalyq avtomobıl shyǵarýshy kompanıa Tesla Inc. Shanhaı qalasynda Megapack energıa jınaqtaý óndirisi boıynsha jańa gıgafabrıka salatynyn málim etti, dep habarlaıdy Almaty-akshamy.kz QazAqparatqa silteme jasap.
Shanhaıda ótken jobalyq qujattarǵa qol qoıý rásiminde habarlanǵandaı, jańa zaýyttyń qurylysyn bastaý bıylǵy úshinshi toqsanǵa josparlanǵan, al óndiris 2024 jyldyń ekinshi toqsanynda iske qosylady.
Bastapqy kezeńde jańa gıgafabrıka jalpy jınaqtalǵan energıasy shamamen 40 GVt/saǵ bolatyn jylyna 10 myń Megapack shyǵarady. Bul zaýytta óndirilgen ónim dúnıe júzine satylady.
Tesla saıtynda atap ótilgendeı, Megapack – bul qýatty modýldik batareıalar, olar energıany saqtaýǵa jáne energetıkalyq qoldaýdy qamtamasyz etýge múmkindik beredi. Olardy paıdalaný energıa júıesin turaqtandyrýǵa jáne elektr qýatynda irkilisti boldyrmaýǵa kómektesedi.
Zaýyt Shanhaıdaǵy pılottyq erkin saýda aımaǵynyń Lıngan aımaǵynda salynady.