Qańtar oqıǵasyna baılanysty Prokýratýraǵa tergeýdiń ruqsat etilmegen ádistemesi boıynsha barlyǵy 301 shaǵym tústi
Olar boıynsha azaptaý jáne qyzmetti asyra paıdalanýǵa qatysty 243 qylmystyq is qozǵalǵan. Sybaılas jemqorlyqqa qarsy qyzmette 234 qylmystyq is qaralyp jatyr, dep habarlaıdy Almaty-akshamy.kz
«Ýaqytsha ustaý ızolátorlarynda adamdardyń qaza bolǵany týraly toǵyz jaǵdaıdy arnaıy prokýrorlar tergeýge aldy. Atalǵan ister aıasynda ustalǵandar 9 laýazymdy tulǵa, onyń ishinde 8 adam - UQKD qyzmetkeri jáne bireýi - polısıa qyzmetkeri. Olar sottyń sanksıasymen qamaýǵa alyndy. Onyń ishinde Almaty oblysy polısıa departamentiniń ǵımaratynda útik qoldanyp azaptaǵan polıseı bar. Almaty qalasynda da UQKD-nyń alty qyzmetkeri azaptaýdy qoldandy degen kúdikke ilindi. Buǵan qosa, «Jabaıy Arman» qylmystyq toby urlap ketken 24 azamattyń barlyǵy dene jaraqatyn alyp, bir adam qaıtys boldy. Almaty oblysy UQKD-nyń taǵy eki qyzmetkeri buryn ýaqytsha ustaý ızolátorynda ustalǵan adamdy uryp-soqqan. Tergeý jalǵasýda», - deıdi Bas prokýror Berik Asylov.
Onyń aıtýynsha, respýblıka boıynsha barlyǵy 230 adam qaza tapty, onyń ishinde 19 áskerı jáne qaýipsizdik kúshteriniń qyzmetkerleri. Almaty qalasynda qaza tapqandar sany - 139 adam. Onyń ishinde 53 qaıtys bolǵan adamnyń ólimniń mán-jaıy anyqtalýda. Olar qala aýmaǵynda ártúrli jaraqattarmen, sonyń ishinde 48 atys, 2 pyshaq jaraqattarymen tabylǵan.