Qazaqstandyqtar buǵan deıin Devıs kýbogynda AQSH komandasymen oınap kórgen joq
Qazaqstan quramasy 15 qyrkúıek kúni Shotlandıanyń Glazgo qalasynda Devıs kýbogynyń toptyq básekesinde AQSH komandasymen kúsh synasady, dep habarlaıdy Almaty-akshamy.kz QazAqparatqa silteme jasap.
Qazaqstan tenıs federasıasynan málim etkenindeı, bul – qazaqstandyqtardyń D tobyndaǵy ekinshi machy.
AQSH quramasy Ulybrıtanıamen birge Devıs kýbogy oınatyla bastaǵan 1900 jyldan beri qatysyp keledi. Jarystyń ózi AQSH-tyń alǵashqy quramasynyń oıynshysy Dýaıt Devıstiń esimimen atalady. Amerıkalyqtar Devıs kýbogyn 32 márte jeńip alǵan. Olar ekinshi oryndaǵy aýstralıalyqtardan (28) oq boıy ozyq tur.
Qazaqstandyqtar buǵan deıin Devıs kýbogynda AQSH komandasymen oınap kórgen joq. ATR dodalarynda Aleksandr Býblık amerıkalyq Teılor Frıtspen tórt ret oınap, sonyń úsheýinde basym tústi. Tommı Polmen de tórt ret kezdesip, tek bireýinde ǵana Býblık jeńgen. Djek Sokpen esep teń – 1:1.
Mıhaıl Kýkýshkın Frıtspen úsh básekesinde de qarsylasyna jol bergen. Sol sekildi T.Pol da eki ret Kýkýshkınnen aılasyn asyryp ketken.
Birinshi machta Qazaqstannyń Nıderland komandasynan jeńilip qalǵany belgili. Sondyqtan búgingi jáne 18 qyrkúıek kúni Ulybrıtanıamen ótetin machta tek jeńis kerek. Sonda ǵana shırek fınalǵa óte alady.
Qazaqstan – AQSH machy elorda ýaqytymen saǵat 21:00-de bastalady.