Qazaqstandyq Anna Danılına juptyq synda Úndistannyń Pýna qalasynda ITF W25 serıasy boıynsha ótken týrnırdiń jeńimpazy atandy, dep habarlaıdy Almaty-akshamy.kz QazAqparatqa silteme jasap.
Qazaqstan tenıs federasıasy málim etkenindeı, A.Danılına ýkraınalyq Valerıa Strahovamen birge fınalda japonıalyqtar Fýna Kozakı – Mısakı Masýdamen bas júldeni sarapqa saldy.
Qazaqstandyq-ýkraınalyq jup tartysty machta 6:0, 2:6, 10:5 esebimen jeńiske jetti.
A.Danılına osylaısha juptyq synda ITF World Tennis Tour dodalarynda sporttyq jolyndaǵy 23-inshi, bıylǵy 9-tıtýlyna qol jetkizdi. Ol sondaı-aq bıyl Polshada WTA 250 jarysynda alǵash ret chempıondyq ataqty jeńip aldy.
«Osy aptadaǵy tabysymyz úshin Valerıa Strahovaǵa alǵysymdy aıtqym keledi. Endi elge kelip, birneshe kún demalamyn. Jańajyldyq merekeni óz otbasymmen ótkizip, sosyn jańa maýsymǵa daıyndalamyn», dedi A.Danılına.
Qazaqstandyq tenısshi qazirgi kezde juptyq synda álemdik reıtıńide 75-orynda tur.
Eske sala keteıik, budan buryn Zańǵar Nurlanulynyń Eýropa tenısi reıtıńinde kósh bastaǵanyn jazǵan bolatynbyz.