"QazMunaıGaz" bıylǵy 9 aıdaǵy óndiristik nátıjelerin jarıalady.
Kompanıa málimetinshe, munaıdy magıstral jáne teńiz arqyly tasymaldaýdyń jalpy kólemi 2022 jyldyń toǵyz aıynda 2021 jyldyń tıisti kezeńimen salystyrǵanda 1,2%-ǵa, ıaǵnı 55 085 myń tonnaǵa deıin tómendedi, dep jazady Almaty-akshamy.kz Inbusiness.kz cilteme jasap.
"2021 jyldyń toǵyz aıymen salystyrǵandaǵy 2022 jyldyń toǵyz aıyndaǵy negizgi óndiristik kórsetkishter:
- Munaı jáne gaz kondensatyn óndirý kólemi 0,9%-ǵa ósip, 16 060 myń tonnaǵa jetti;
- Munaı tasymaldaý kólemi ótken jyldyń tıisti kezeńindegi 55 727 myń tonnamen salystyrǵanda 55 085 myń tonnaǵa jetti;
- Qazaqstandyq jáne rýmyndyq Munaı óńdeý zaýytynda kómirsýtek shıkizatyn óńdeý kólemi 5,8%-ǵa artyp, 14 896 myń tonnaǵa jetti.
İlespe jáne tabıǵı gazdy óndirý kólemi 1,4%-ǵa, ıaǵnı 5 942 mln m3 deıin ulǵaıdy", - delingen kompanıa taratqan aqparatta.
«QazMunaıGaz» aqparatyna sáıkes, «Teńiz» ken ornynda munaı óndirý aıtarlyqtaı 13,6%-ǵa ósip, 4 302 myń tonna (táýligine 126 myń barel) boldy. İlespe gaz óndirý de 18,8%-ǵa artyp, 2 394 mln m3 jetti. Óndiristiń ulǵaıýy OPEK+ kelisimi boıynsha shekteýlerdiń alynyp tastalýyna baılanysty boldy.
«Qashaǵan» ken ornynda munaı óndirý 734 myń tonnaǵa deıin tómendedi (táýligine 21 myń barr.). Buǵan bıyl tamyz aıynda gazdyń aǵýyna baılanysty júrgizilgen jóndeý-qalpyna keltirý jumystary kezinde teńiz jáne jerústi keshenderindegi óndiristik obektilerdiń toqtap turýy áser etti. İlespe gazdy óndirý kólemi de tómendep, 451 mln m3 qurady.
«Qarashyǵanaq» ken ornynda munaı men kondensat óndirý byltyrmen salystyrǵanda ózgerissiz 768 myń tonna (táýligine 22 myń barr.) kóleminde qaldy. Gaz óndirý 5,3%-ǵa artyp, 1 479 mln m3 qurady. Gaz óndirisiniń ósýi 4-shi gazdy keri aıdaý kompresorynyń qosylýyna jáne gazdy qaıta óńdeý kóleminiń ulǵaıýyna baılanysty boldy.
Kompanıa óndirgen munaı men gaz kondensatyn satý kólemi 2022 jyldyń toǵyz aıynda 1,1%-ǵa ulǵaıyp, 16 318 myń tonnaǵa jetti, onyń 60,5%-y eksportqa shyǵaryldy.
«Kompanıa óndirgen munaı men gaz kondensatyn ishki naryqqa jetkizý kólemi 6 439 myń tonnany qurady, onyń ishinde operasıalyq aktıvterdiń (Ózenmunaıgaz, Embimunaıgaz, Qazaqtúrikmunaı jáne Óriktaý Opereıtıng) óńdeý jáne satý úshin Atyraý munaı óńdeý zaýytyna (AMÓZ), Shymkent munaı óńdeý zaýytyna (PQOP) jáne Pavlodar munaı-hımıa zaýyty (PMHZ) jetkizilgen 3 740 myń tonna shıki munaıy bar», - delingen aqparatta.