Kólik mınıstrligine qarasty temirjol jáne sý kóligi komıteti Aqtaý qalasynda dándi daqyldardyń eksportyn qamtamasyz etý boıynsha kóshpeli keńes ótkizdi.
Keńeske temirjol jáne sý kóligi komıtetiniń tóraǵasy Jánibek Taıjanov, QR Aýyl sharýashylyǵy mınıstrliginiń, Mańǵystaý oblysy ákimdiginiń, QR porttarynyń teńiz ákimshiliginiń, Qazaqstan temir joly, teńiz porttarynyń, astyq termınaldarynyń ókilderi men eksporttaýshylar, treıderler, júk jóneltýshiler qatysty, dep habarlaıdy aqshamnews.kz.
Keńes barysynda Aqtaý jáne Quryq teńiz porttary arqyly dándi daqyldardy úzdiksiz tasymaldaýdy qamtamasyz etý jáne eksport áleýetin arttyrý, onyń ishinde veterınarıalyq jáne fıtosanıtarıalyq sertıfıkattardy berýdi jeńildetý joldary qaraldy. Sondaı-aq, tasymaldaýshylardyń jedel shtab otyrysynda aıtqan fıtosanıtarıalyq qyzmet reglamentin ózgertý jáne astyqty eksporttaýǵa ruqsat berý máseleleri qozǵaldy.
Keńes qorytyndysy boıynsha veterınarıalyq jáne fıtosanıtarıalyq sertıfıkattardy berý rásimin ońaılatý boıynsha naqty usynystar ázirlenip, QR aýyl sharýashylyǵy mınıstrliginiń qaraýyna joldandy.
Bul turǵyda Kólik mınıstrligi apta saıyn astyq daqyldarynyń eksportyn qamtamasyz etý jónindegi jedel shtabtyń otyrysyn ótkizedi.
Aıta keteıik, bıylǵy 10 aıdyń qorytyndysy boıynsha dándi daqyldar eksportynyń kólemi shamamen 6 mln tonnany qurady.
Teńiz porttary arqyly dándi daqyldardyń eksportyn úzdiksiz qamtamasyz etýdiń ózekti máseleleri qaraldy
- Avtor aqshamnews.kz
- 17:40, 02 jeltoqsan 2024
Sýret: Gov.kz