Temirtaýda magıstraldyq jylý qubyryndaǵy apatqa baılanysty myńdaǵan turǵyn jylýsyz qaldy, dep habarlaıdy aqshamnews.kz turkystan.kz-ke cilteme jasap.
Jaǵdaıdy aýa temperatýrasynyń kúrt tómendeýi qıyndatyp otyr: Qaraǵandy oblysynda qazir qatty aıaz baıqalýda. Belgili bolǵandaı, 13 qańtar kúni keshke Temirtaýda qalanyń iri turǵyn aýdandaryn jylýmen qamtamasyz etetin magıstraldyq jylý jelisinde apat bolǵan.
Sonyń saldarynan 8-shaǵynaýdandaǵy shamamen 40 kópqabatty úı jáne Otradnoe kentindegi ondaǵan jekemenshik úı jylýsyz qaldy. Sondaı-aq birqatar kásipkerlik nysandary men áleýmettik sala obektilerinde jylý berý ýaqytsha toqtatyldy.
Temirtaý qalasynyń ákimi Ǵalym Áshimovtiń aıtýynsha, zaqym 1970-jyldardan beri kúrdeli jóndeý júrgizilmegen qubyrdyń eski bóliginde oryn alǵan.
«Zaqymdanǵan oryn anyqtaldy, mamandar qalpyna keltirý jumystaryna kiristi. Apattyq-qalpyna keltirý brıgadalary jumys istep jatyr, barlyq qajetti kúsh pen tehnıka jumyldyryldy. Aqaýlardy múmkindiginshe qysqa merzimde joıý úshin jumystar úzdiksiz júrgizilýde», — dep jazdy ol áleýmettik jelidegi paraqshasynda.
14 qańtar kúni saǵat 13:00-den bastap jospardan tys jóndeý jumystaryn júrgizý úshin jylý jelisiniń bir bóligi ajyratyldy. Sonyń nátıjesinde 8-shaǵynaýdandaǵy úıler ýaqytsha ystyq sý men jylýsyz qaldy.
Sońǵy málimetterge sáıkes, qazirgi ýaqytta Temirtaýda jóndeý jumystary tolyq aıaqtalyp, jylý jelisin toltyrý jumystary júrgizilip jatyr. Jylýdyń úılerge jetýine biraz ýaqyt qajet bolady.