Májilis depýtaty, «AMANAT» partıasy fraksıasynyń jetekshisi Elnur Beısenbaev Qazaqstandaǵy kınonaryqtyń qazirgi jaǵdaıyna alańdaýshylyq bildirip, birqatar kınoteatr jelileriniń monopolıalyq saıasat júrgizip otyrǵanyn málimdedi.
Onyń aıtýynsha, otandyq kınoındýstrıany sanaýly ǵana «tańdaýly» top baqylaýda ustap otyr. Bul týraly aqshamnews.kz habarlady.
Depýtattyń sózinshe, Memleket basshysy Qasym-Jomart Toqaev kreatıvti ındýstrıany ekonomıkanyń basym baǵyttarynyń biri retinde aıqyndaǵan. Alaıda kıno salasyndaǵy qalyptasqan júıe bul mindetterdiń tolyq iske asýyna kedergi keltirip otyr. «AMANAT» partıasynyń atyna kıno salasy ókilderinen kınoteatrlardyń kasalyq túsimderge qatysty ádiletsiz talaptary jóninde kóptegen shaǵym túsken.
Elnur Beısenbaev kınoteatrlar fılmniń tabysty nemese tabyssyz bolýyna qaramastan, óz úlesterin aldyn ala alyp otyrǵanyn atap ótti. Onyń aıtýynsha, bul úles taza paıdadan emes, jalpy kasalyq túsimnen ustalady. Mundaı jaǵdaıda rejıserler men prodúserler qysymnan qaýiptenip, máseleni ashyq kótere almaı otyr. Sonymen qatar fılm avtorlary jarnama men ilgeriletý úshin qosymsha tólemder jasaýǵa májbúr, al keıbir jaǵdaılarda «kóleńkeli jarnalardyń» bar ekeni de aıtylyp otyr.
Depýtattyń dereginshe, bul talaptar memlekettik qarjy esebinen túsirilgen fılmderge de qatysty. Máselen, búdjet qarajatyna túsirilgen «QAITADAN» fılmi prokatta 1 mıllıard teńgeden astam tabys tapqanymen, onyń 550 mıllıon teńgesi kınoteatrlarǵa ketken. Al fılm óndirisine memleket nebári 190 mıllıon teńge bólgen. Osylaısha, jekemenshik kınoteatr jelileri memleket salǵan ınvestısıadan birneshe ese kóp qarjyny, ol búdjetke qaıtarylmaı turyp-aq alyp otyr.
Elnur Beısenbaev ekran men kórermen ornyn ǵana usynatyn kınoteatrlar fılm avtorlaryna qaraǵanda áldeqaıda kóp paıda taýyp otyrǵanyn synǵa aldy. Onyń pikirinshe, mundaı júıe fılmniń ózin-ózi aqtaýyna kedergi keltirip, qazaqstandyq kınoındýstrıanyń damýyn tejep otyr. Sonyń saldarynan elimizde kóbine komersıalyq komedıalar túsirilip, tarıhı, mádenı jáne áleýmettik mańyzy bar týyndylardyń sany azaıyp keledi.
Depýtat qazirgi tańda qazaqstandyq kınonaryqta prokat sharttaryn, ekran sanyn, kórsetilim ýaqytyn jáne qaı fılmniń kórermenge jetetinin sanaýly ǵana kınoteatr jelileri anyqtaıtynyn aıtty. Onyń sózinshe, bul – ádil básekege qaıshy keletin ashyq monopolıalyq saıasat.
Osyǵan baılanysty Elnur Beısenbaev kasalyq túsimniń 50 paıyzyna deıin alyp otyrǵan kınoteatr jelilerine qatysty Básekelestikti qorǵaý jáne damytý agenttigi men basqa da ýákiletti organdar tarapynan keshendi tekserý júrgizýdi surady. Sondaı-aq ol kınoteatrlar fılm óndirisine ketken shyǵyn tolyq ótelmeıinshe, kasalyq túsimnen úles almaýy tıis degen ustanymdy bildirdi.
Depýtat halyqaralyq tájirıbeni mysalǵa keltirip, AQSH-ta prokattyń alǵashqy aptalarynda stýdıalar kasalyq túsimniń 70–90 paıyzyna deıin alatynyn atap ótti. Osy tájirıbeni negizge ala otyryp, kınoteatrlar, prokatshylar men kınostýdıalar arasyndaǵy kelisimsharttardy qaıta qaraý qajettigin jetkizdi.