Temirjol stansıasynda mas áıel poıyz astyna túse jazdady. Mashınıst birneshe tonna tartatyn poıyz quramyn der kezinde toqtatty, - dep habarlaıdy Aqshamnews.kz tilshisi.
Oqıǵa túngi saǵat 10 shamasynda bolǵan.
"Qazaqstan temir joly" UK" AQ málimetinshe, 23 shildede saǵat 21:41-de Tobyl – Qostanaı ýchaskesinde Astana – Oral baǵyty boıynsha kele jatqan "Talgo" jolaýshylar poıyzynyń mashınısti relsten áıel adamdy baıqap qalyp, shuǵyl túrde tejeý qoldanǵan. Aldyn ala málimet boıynsha, áıel adam mas kúıinde bolǵan.
"Mashınıstiń jedel ári kásibı áreketiniń arqasynda qaıǵyly oqıǵa bolmady. Áıel zardap shekken joq jáne ol jelilik polısıa bóliminiń qyzmetkerlerine tapsyryldy", — dep málimdedi "Qazaqstan temir joly" baspasóz qyzmeti.
Oqıǵa saldarynan poıyzdyń júrýi 12 mınýtqa keshikken.
QTJ ókilderi belgilenbegen jerde temirjoldy kesip ótý, ásirese mas kúıde, óte qaýipti ekenin jáne aýyr saldarǵa ákelýi múmkin ekenin eskertti.
Aıta keteıik, buǵan deıin Almaty-2 stansıasynda 15 jastaǵy jasóspirim vagonnyń tóbesine shyǵyp, toq soǵyp, qatty kúıik alǵan bolatyn.