Abaı Qunanbaıulynyń 180 jyldyǵyna oraı Almatyda jalpyqalalyq ekologıalyq aksıa ótedi, - dep habarlaıdy Aqshamnews.kz tilshisi.
2025 jyly uly qazaq aqyny, aǵartýshy, oıshyl Abaı Qunanbaıulynyń týǵanyna 180 jyl tolady. Osy ataýly dataǵa oraı Almaty qalasynda respýblıkalyq «Taza Qazaqstan» baǵdarlamasy aıasynda keń kólemdi ekologıalyq aksıa uıymdastyrylady.
Almatynyń bes aýdanyn — Almaly, Bostandyq, Áýezov, Medeý jáne Naýryzbaı aýdandaryn qıyp ótetin, uzyndyǵy 15 shaqyrymdy quraıtyn Abaı dańǵyly boıynda abattandyrý jáne sanıtarlyq tazalaý jumystary júrgizilýde.
26 shilde kúni saǵat 9.00-de Abaı alańynda aýqymdy senbilik pen tanymal tulǵalardyń qatysýymen shaǵyn konsert ótedi.
Abaı dańǵyly boıyndaǵy senbilikke PIK (páter ıeleri kooperatıvi), MIB (múlik ıeleriniń birlestigi), QS (qarapaıym seriktestik), sondaı-aq kásipkerlik nysandarynyń ókilderi men belsendi qala turǵyndary jumyldyrylady. İrgeles aýmaqtardy keshendi tazalaý josparlanǵan.
Bul ekoaksıa — qalamyzǵa degen súıispenshiligimizdiń, ishki mádenıetimizdiń jáne uly oıshylǵa degen qurmetimizdiń aıqyn kórinisi bolmaq. Abaı Qunanbaıuly óziniń óleńderi arqyly adamnyń tabıǵatpen tyǵyz baılanysyn jetkizgen. Onyń shyǵarmashylyǵynda tabıǵat erekshe oryn alady jáne ol tabıǵatqa degen iltıpatty kózqarasyn aıqyn kórsete bilgen.