33 jastaǵy Ásel Qýanyshbaevanyń týystary Qostanaıdaǵy jeke klınıkada bolǵan jaǵdaıǵa qatysty tergeý júrgizýdi talap etip otyr. Olardyń aıtýynsha, artyq maıdy alyp tastaý operasıasynan keıin Ásel jansaqtaý bólimine túsken. Áıel oblystyq aýrýhanaǵa sepsıs, irińdi perıtonıt, pnevmonıa jáne aýyr dárejeli anemıa dıagnozdarymen shuǵyl jetkizilgen. Onyń aǵzalary jumys istemeı qalǵan, - dep jazady Aqshamnews.kz tilshisi “NG” materıaldaryna silteme jasap.
Áseldiń anasy Gúljan Esmuratovanyń aıtýynsha, qyzy ajyrasqannan keıin keıin óz kelbetin ózgertkisi kelgen. Qurbysy dene pishinin sátti ózgertkennen keıin, Ásel de lıposaksıa jasaýǵa sheshim qabyldap, Qostanaıdaǵy sol jeke klınıkaǵa júgingen.
4 shildede Áselge aınalmaly lıposaksıa jasalǵan. Anasynyń sózinshe, operasıadan keıin-aq qyzy ishiniń qatty aýyratynyn aıtyp shaǵymdana bastaǵan. Alaıda klınıka dárigerleri bul qalypty jaǵdaı dep, aýyrsynýdy basatyn dáriler jazyp bergen. Úshinshi kúni Ásel úıine shyǵarylǵan, biraq onyń jaǵdaıy kúrt nasharlaǵan. Jedel járdem shaqyrylyp, áıel shuǵyl túrde aýrýhanaǵa jetkizilgen. Qalalyq aýrýhanada oǵan úsh shuǵyl operasıa jasalǵan.
Gúljan Esmuratovanyń aıtýynsha, aýrýhanaǵa túsken kezde dárigerler sepsıs, myqyn isheginiń tesilýi, jaıylǵan irińdi-fıbrozdy perıtonıt, termınaldyq faza, aınalmaly lıposaksıadan keıingi jaǵdaı, pnevmonıa, aýyr dárejeli sozylmaly anemıa jáne kóp aǵzalyq jetkiliksizdik degen dıagnoz qoıǵan.
Qostanaı qalalyq aýrýhanasynyń málimetinshe, jeke klınıkada jasalǵan operasıa barysynda ishek tesilgen – bul óte sırek ári ómirge qaýip tóndiretin asqyný. Jergilikti dárigerler Almatydaǵy Ulttyq ǵylymı hırýrgıa ortalyǵymen telemedısına arqyly keńes júrgizýge májbúr bolǵan.
"Shuǵyl operasıa aýyr ótti, biraq tolyq kólemde jasaldy. Hırýrgıalyq aralasý durys bolǵanyn mamandar rastady jáne ári qaraı emdeýge qatysty usynystar berildi, olardyń barlyǵy oryndaldy", – dedi Qostanaı qalalyq aýrýhanasy bas dárigeriniń mindetin atqarýshy Qýat Álmaǵambetov.
Onyń aıtýynsha, Ásel qazir de jansaqtaý bóliminde jatyr, biraq jasandy tynys alý apparatyna qosylmaǵan, esin biledi, ózi tynys alyp, tamaqtanady. Jaǵdaıy jaqsaryp keledi.
Áseldiń anasy operasıa jasaǵan klınıka óz kinásin moıyndamaı otyrǵanyn aıtty. Degenmen olar moraldyq ótemaqy retinde aqsha usynǵan, biraq bul úshin pasıent tarapynan eshqandaı talap qoımaıtyny jóninde qolhat jazý shartyn qoıǵan. Otbasy mundaı usynystan bas tartqan.
"Advokat jaldadym. Endi polısıaǵa, prokýratýraǵa júginemiz. Ádil tergeýge úmittenemiz", – deıdi zardap shekken áıeldiń anasy.
Jeke klınıka ókilderi bul jaǵdaıǵa qatysty keıin pikir bildiretinin aıtqan.