Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda 2025 jyldy «Jumysshy mamandyqtary jyly» dep jarıalaǵany barshaǵa belgili. Qoǵamdy áleýmettik-ekonomıkalyq jańǵyrtýda kásiptik tehnıkalyq bilim berý salasynyń mańyzy orasan zor. Sebebi, tehnıkalyq jáne kásiptik bilim berý júıesi eńbek naryǵynyń talaptaryna jáne el ekonomıkasynyń qajettilikterine sáıkes básekege qabiletti kadrlardy daıarlaıdy.
Almaty kólik jáne komýnıkasıalar koleji elimiz boıynsha temirjol mamandaryn daıarlaıtyn oqý oryndarynyń biri jáne biregeıi. Kolejimizdi bitirgen túlekterimiz elimizdiń ekonomıkasynyń damýyna óz úlesterin qosyp keledi. 95 jyldyq tarıhy bar kolejimiz búgingi tańda temirjol salasyna 7 mamandyq boıynsha orta arnaýly kásibı jáne jumysshy mamandaryn daıarlaıdy. Kolejimizde stýdentter jumysshy mamandyqtary boıynsha tegin bilim alyp qana qoımaı, bir ýaqyt ystyq taǵammen qamtamasyz etilgen. Mamandar daıarlaýǵa arnalǵan memlekettik tapsyrys jyl saıyn aıtarlyqtaı ulǵaıtylyp keledi.
Almaty kólik jáne komýnıkasıalar kolejinde dýaldy oqytý júıesi keń qoldanys tapqan. Bul júıe stýdentterge tek bilim ǵana emes, naqty óndiris tájirıbesin de alýǵa múmkindik beredi. Dýaldy oqytý arqyly kolej túlekteri eńbek naryǵynda suranysqa ıe bolady, olardyń bolashaqta jumysqa ornalasý múmkindikteri joǵarylaıdy. Bul júıe boıynsha mamandardy eńbek naryǵyna daıarlaýdyń tıimdi joldaryn áleýmettik seriktestermen birlese otyryp júzege asyryp kelemiz. Munyń birqatar artyqshylyqtaryn atap ótýge bolady. Eń aldymen, teorıa men praktıkanyń úılesimi. Stýdentter oqý barysynda tek leksıalar men semınarlarǵa qatysyp qana qoımaı, ártúrli kásiporyndar men óndiristik oryndarda tájirıbe jınaqtaıdy. Kolej seriktes kásiporyndarmen kelisim-sharttar jasasyp, stýdentterge naqty óndiris oryndarynda tájirıbeden ótý múmkindigin beredi.
Ekinshi bir artyqshylyq, eńbek naryǵynda básekege qabilettilik. Oqýǵa túsken kúnnen bastap, dıplom alǵanǵa deıin temirjol salasynyń barlyq baǵyttaǵy mamandyqtaryna sáıkes tájirıbe jınaqtaǵan túlek tek dıplom alyp qana qoımaı, jumys berýshilerdiń talaptaryna saı naqty kásibı daǵdylarǵa ıe bolady.
Úshinshi artyqshylyq – bitirýshi túlekterdiń jumysqa ornalasý múmkindigi. Stýdentterimiz bir óndiris ornynda birneshe jyl tájirıbeden ótken soń, sol kásiporyndarda jumysqa ornalasý múmkindigi búgingi tańda joǵary deńgeıde.
Dýaldy oqytý júıesin júzege asyrý aıasynda kolej ben birqatar iri kólik jáne komýnıkasıa salasyndaǵy kásiporyndar arasynda yntymaqtastyq baǵdarlary jasalǵan. Olardyń qatarynda temirjol, logıstıka jáne baılanys qyzmetin kórsetetin mekemeler bar. Atap aıtsaq: «Qazaqstan temirjoly» ulttyq kompanıasynyń Almaty júk tasymaly bólimshesi, Almaty magıstraldyq jeli bólimshesi, Almaty vagon paıdalaný deposy, Almaty lokomotıv paıdalaný deposy, Almaty jol dıstansıasy, Almaty elektrmen jabdyqtaý dıstansıasy, Almaty belgi berý jáne baılanys dıstansıasy, «Vagonservıs» AQ Almaty fılıaly; «Shyńǵar Trans» JSHS, «Almaty metropolıteni» MQM, «TransCom» Transport Group jáne «Almatylift» JSHS kompanıalarymen kelisim-sharttar jasalynyp stýdentterimizge óndiristik tájirıbeden ótýge jaǵdaı jasalǵan.
Bul kásiporyndar stýdentterge tájirıbeden ótýge múmkindik beredi jáne bolashaqta túlekterdi jumysqa qabyldaýǵa da daıyn.
Jumysshy mamandyǵynyń mártebesin arttyrý, óndiristik jáne tehnologıalyq ósýine, kásibı biliktilikti aıqyndaýǵa jáne kadrlar daıarlaý júıesin damytýǵa yqpal etetin WorldSkills kásibı sheberlik chempıonatyna kolej stýdentteri jyl saıyn belsendi qatysady.
Almaty qalasy ákimdiginiń jáne Almaty qalasy bilim basqarmasynyń qoldaýymen búgingi tańda kásiptik tehnıkalyq bilim salasyna asa mán berilip, sheteldermen tájirıbe almasýǵa qoldaý kórsetilýde. Maqsat – kásiptik tehnıkalyq bilim berý salasyndaǵy oqytýshylardyń kásibı deńgeıin kóterý, stýdentterge bilim berý sapasyn jaqsartý barysynda qajetti materıaldar jınaqtaý jáne bilim berý baǵdarlamalaryna jańashyldyqtar engizý.
Qoryta aıtqanda, kolejimizde bilim berý sapasyn arttyrý, oqýshylarymyzdyń kásibı biliktiligin damytý jáne jumysqa ornalasý múmkindikterin keńeıtý baǵytyndaǵy jumystardy joǵary deńgeıde jalǵastyrý josparlanǵan.