Sarapshy qyzylsha epıdemıologıalyq jaǵdaıy týraly aıtyp berdi
Almaty qalasynyń ÓKQ alańynda dárigerler men epıdemıologtardyń qatysýymen qyzylshamen syrqattanýshylyq boıynsha epıdemıologıalyq jaǵdaıǵa arnalǵan baspasóz konferensıasy ótti. Sarapshylar biraýyzdan qyzylsha ınfeksıasynyń aldyn alatyn jalǵyz tıimdi qural vaksınasıa ekenin aıtady, dep habarlaıdy almaty-akshamy.kz
Qyzylsha - bul aýa-tamshylary arqyly taralatyn ınfeksıalar tobyna jatatyn jedel juqpaly vırýstyq aýrý. Aýrý adamnan adamǵa aýa arqyly, tynys alý joldarynyń tamshylarymen nemese juqtyrǵan adamdardyń murnynan nemese tamaǵynan sekresıalarmen tikeleı baılanysta bolady.
Balalar ınfeksıonısti, profesor jáne medısına ǵylymdarynyń doktory Raýshan Ydyrysovanyń aıtýynsha, qyzylshanyń barlyq basqa ınfeksıalardan basty aıyrmashylyǵy -onyń taralý jyldamdyǵynyń joǵary bolýynda.
«Birneshe jyl buryn bolǵan qyzylsha dertiniń asqynýy men qazirgi jaǵdaıdaǵy taralýynyń aıyrmashylyǵy nede? Eger aldyńǵy aýrýshańdyq 15 jastan asqandar men 25 jasqa deıingi adamdar arasynda qatty taralsa, qazir jasy kishi balalar aýyryp jatyr, sol sebepti de vaksınasıa alty aıǵa jyljydy. Sondyqtan barlyq jas toptarynda syrqattanýshylyq tirkelýde», - dedi R.Ydyrysova.
Infeksıonısttiń aıtýynsha, bul aýrý adamnyń ımýnıtetin kúrt túsiredi. Onyń ekinshi jaǵymsyz qasıeti - asqynýlar. Qyzylsha eń aldymen ókpe men tynys alý joldaryna keri áser etedi. As qorytý júıesiniń zaqymdanýy da baıqalýy múmkin.
«Biz durys tásilder men emdeýdi durys uıymdastyrý arqyly ólim-jitim jaǵdaılarynyń aldyn alyp otyrmyz. Biraq jıi kezdesetin bir asqyný bar - bul jedel sklerozdy panensefalıt. Óte kishkentaı balalar úshin eń qaýipti asqyný. Eger olar bir jasyna deıin aýyrǵan bolsy, olarda bul asqyný bolýy múmkin, tipti birneshe jyldan keıin de, óıtkeni vırýs mı tininde saqtalady. Sýbakýtalyq sklerozdy panensefalıt tek bir jasqa deıingi balalarda ǵana emes, sonymen qatar egde jastaǵy toptarda da kezdesedi», - dep túsindirdi juqpaly aýrýlar dárigeri.
Sarapshy qyzylsha ınfeksıasy men aýrýdyń asqynýyn boldyrmaıtyn jalǵyz tıimdi qural vaksınasıa ekenin aıtady.
«Vırýstyń juqpaly qasıetteriniń kúsheıýine baılanysty naýqastardyń sany da kóp. Bul ǵylymı túrde vırýlenttilik dep atalady, al vırýlenttilik kúsheıgen saıyn, bul asqynýlardyń sany kóbirek bolady degendi bildiredi. Qazir barlyq jas toptarynda kezdesetin qyzylsha máselesi óte mańyzdy. Buǵan deıin barlyq sarapshylar aıtqandaı, vaksınasıa mańyzdy ról atqarady. Tek ol aýamen taralatyn osyndaı ınfeksıamen adamdardy, onyń ishinde jas balalardy qorǵaýǵa múmkindik beredi», - dep qorytyndylady R.Ydyrysova.