Qaýly jobasy 22 mamyrǵa deıin qoǵam talqylaýynda bolady
«Ashyq NQA» portalynda Almaty qalasynda tirkelgen Qazaqstan azamattarynyń jekelegen sanattaryna ambýlatorıalyq emdeý kezinde tegin medısınalyq kómektiń kepildik berilgen kólemin, onyń ishinde dárilik zattardy, emdik ónimderdi tegin berý týraly sheshimine tolyqtyrýlar engizý jobasy jarıalandy, dep habarlaıdy Almaty-akshamy.kz.
Bul qujat «Tegin medısınalyq kómektiń kepildik berilgen kólemi sheńberindegi dárilik zattar» bólimine birqatar dárini engizýdi kózdeıdi.
Atap aıtqanda:
- Tosılızýmab – aorta doǵasy sındromyn (Takaıasý) emdeýge;
- Azasıtıdın – mıelodısplastıkalyq sındromdy emdeýge;
- Everolımýs – týberozdy sklerozdy emdeýge;
- Inflıksımab – kron aýrýyn emdeýge;
- Fınlepsın retard – sananyń buzylýymen jáne eki jaqty tonıkalyq-klonıkalyq ustamalarmen fokaldi ustamalary bar sımptomatıkalyq fokaldi epılepsıany emdeýge;
- Denozýmab – osteoporozǵa;
- Ekýlızýmab – ustamaly gemoglobınýrıaǵa (túngi);
- Levetırasetam – krıptogendi oshaqty epılepsıaǵa;
- Anakınra – Stılla aýrýyn emdeýge;
- Sıtrýllına malat, Ýbıdekarenon – MELAS sındromyn emdeýge.
Almaty qalalyq qoǵamdyq densaýlyq saqtaý departamentinen túsindirgendeı, jergilikti ókildi organdar tegin medısınalyq kómektiń kepildik berilgen kólemin qosymsha usyný týraly sheshim qabyldaıdy.
«Qazaqstan Respýblıkasy azamattarynyń jekelegen sanattaryna ambýlatorıalyq emdeý kezinde tegin medısınalyq kómektiń kepildik berilgen kólemimen, onyń ishinde dárilik zattardy, arnaıy emdik ónimderdi, medısınalyq buıymdardy qosymsha qamtamasyz etýdi kózdeıtin Almaty qalasy máslıhaty sheshiminiń jobasy ázirlendi», - dep jazylǵan kelisim mátininde.
Qaýly jobasy 22 mamyrǵa deıin qoǵam talqylaýynda bolady.