7-8 jeltoqsan aralyǵynda Qazaq ulttyq qyzdar pedagogıkalyq ýnıversıtetinde «Tech QyzPu Niğde Hack: 24 saǵat kodtaý jáne shyǵarmashylyq» taqyrybynda hakaton ótti. Otandyq stýdentter men ázirleýshiler arasynda ótken jarys ınovasıalardy jáne yntymaqtastyqty damytýǵa baǵyttalǵan, dep habarlaıdy aqshamnews.kz
İs-shara QyzPU ýnıversıteti men Túrkıanyń Nııde Ómer Halısdemır ýnıversıteti jáne Nııde tehnoparkiniń seriktestigi aıasynda uıymdastyryldy.
Hakatonǵa 12 otandyq ýnıversıtetten 23 komanda qatysty. Qatysýshylar toptyq jumysty jáne shyǵarmashylyq sheshimder tabýdy yntalandyrý arqyly 24 saǵat ishinde ınovasıalyq baǵdarlamalyq sheshimder ázirleýi tıis boldy.
«Ýnıversıtetimizde jastar úshin mańyzdy ári qyzyqty shara ótip jatyr. Hakatonǵa Qazaqstannyń túkpir-túkpirinen jınalǵan IT mamandyǵyna qyzyǵýshylyq tanytqan talantty jastar qatysýda. Jastarǵa qoǵamdaǵy jáne bilim berý salasyndaǵy ózekti máseleler usynylyp, solarǵa shyǵarmashylyq sheshim tabý mindettelgen. Sondyqtan stýdentterimiz 24 saǵat boıy ýnıversıtet qabyrǵasynda qalyp, usynylǵan máselelerge asa shyǵarmashyl jáne tyń sheshimder usynýda. Olardyń mańyzdy suraqtarǵa naqty ári kreatıvti jaýaptar taýyp jatqany bizdi erekshe qýantady», – dedi Qazaq ulttyq qyzdar pedagogıkalyq ýnıversıtetiniń basqarma tóraǵasy — rektory Gúlmıra Qanaı.
Hakaton sońynda komandalar óz jobalaryn QyzPU, Nııde Ómer Halısdemır ýnıversıteti jáne Nııde tehnoparkiniń ókilderi baǵalaıtyn qazylar alqasyna usyndy. Sonymen qatar qatysýshylarǵa «TilTuran» JSHS ókili Felıks Fatyhov myrza da tórelik etti. Eki kúnge sozylǵan baıqaý qorytyndysy boıynsha: Dulati University «Hexagon komandasy», QyzPU-dyń «Byte Belles» jáne «Digital Devas» komandasy – İİİ oryn, Almaty energetıka jáne baılanys ýnıversıtetiniń «Energo University» komandasy jáne QyzPU «Digital Nomads» komandasy – İİ oryn, al Ál-Farabı atyndaǵy Qazaq ulttyq ýnıversıtetiniń «CyberPercy» komandasy júldeli İ oryndy ıelendi. İİ jáne İİİ oryn ıegerlerine qarjylaı sertıfıkattar berilse, İ oryn ıegerlerine qarjylaı sertıfıkattarmen qatar Túrkıadaǵy Nııde tehnoparkiniń akselerasıalyq baǵdarlamasyna qatysý sertıfıkaty tabystaldy. Sonymen qatar komanda jetekshileri de Alǵys hattarmen marapattaldy.
Hakatonda jeńimpaz atanǵan Ál-Farabı atyndaǵy Qazaq ulttyq ýnıversıtetiniń «CyberPercy» komandasy óz qýanyshtarymen bólisti: «Biz – Ál-Farabı atyndaǵy Qazaq ulttyq ýnıversıtetiniń 4 kýrs stýdentterimiz. Hakaton barysynda qazaq tilin úırenýge arnalǵan onlaın platforma qurýdy mindettegen 5-shi keısti tańdadyq. Jumystyń alǵashqy jáne mańyzdy kezeńi tereń taldaý jasaý boldy. Sondyqtan túni boıy uıqysyz eńbek etip, qajetti analızder júrgizdik. Tek osydan keıin ǵana jobany iske asyrýǵa kiristik. Bul proses biz úshin erekshe qyzyqty ári shabytqa toly boldy. Eń bastysy, eńbegimiz aqtalyp, nátıjesinde jeńiske jettik. Uıymdastyrýshylarǵa osyndaı múmkindik syılaǵany úshin alǵysymyzdy bildiremiz. Túrkıa, bizdi kút!».
Aıta keteıik, is-shara aıasynda Qazaq ulttyq qyzdar pedagogıkalyq ýnıversıteti men Nııde Ómer Halısdemır ýnıversıteti arasyndaǵy yntymaqtastyqty nyǵaıtý maqsatynda jańa kelisimshartqa qol qoıyldy. Bul kelisim aıasynda birlesken ǵylymı jobalardy júzege asyrý josparlanyp otyr. Atap aıtqanda, jobalar mektepke deıingi oqytý jáne tárbıeleý, bastaýysh oqytýdyń pedagogıkasy men ádistemesi, sondaı-aq pedagogıka jáne psıhologıa baǵyttaryn qamtıdy. Sonymen qatar taraptar doktorantýra baǵdarlamalaryn birlese ázirlep, osy baǵytta jańa bastamalardy iske asyrýǵa nıet bildirip otyr. Bul kelisim eki ýnıversıtettiń bilim jáne ǵylym salasyndaǵy yntymaqtastyǵyn jańa deńgeıge kótermek.
«Búgin Qazaq ulttyq qyzdar pedagogıkalyq ýnıversıteti jáne Nııde Ómer Halısdemır ýnıversıteti birlese «Hakaton» uıymdastyrdyq. Sonymen qatar eki ýnıversıtet arasynda seriktestik týraly kelisimge qol qoıyldy. Biz eki týystas memleketpiz. Osymen úshinshi ret Almaty qalasyna kelip otyrmyz. Biz óte qýanyshtymyz. Yntymaqtastyǵymyz 100 jyldyq bolsyn», — dedi Nııde Ómer Halısdemır ýnıversıtetiniń rektory Hasan Ýslý.
