«Aǵyn» atty álem dramatýrgıasy teatry ashyldy.
Jańa óner ordasynyń ereksheligi – sahnada tek 18 ben 28 jas aralyǵyndaǵy jas akterlar oınaıdy, dep habarlaıdy Almaty-akshamy.kz.
Olar - Temirbek Júrgenov atyndaǵy Qazaq ulttyq óner akademıasynyń túlekteri. Repertýarda qazaq jáne álem jazýshylary men dramatýrgteriniń shyǵarmalary bar. Atap aıtqanda, Muhtar Áýezov, Rollan Seısenbaev, Ýılám Saroıan, Genrı Mıller, Evgenıı Popov, Gabrıel Garsıa Markestiń shyǵarmalary sahnalanady. Qoıylymdar memlekettik tilde qoıylady, sondaı-aq, kórermenderdiń suraýy boıynsha sýbtıtrler beriledi.
Óner oshaǵynyń shymyldyǵy «Namys» spektaklimen ashyldy. Jazýshy Rollan Seısenbaevtyń shyǵarmasynyń jelisimen sahnalanǵan qoıylymda qazaq- jońǵar soǵysynda qol bastaǵan qazaq batyry Kúshikbaı týraly tereń syrǵa toly shyndyq aıtylady.
«Bul - meniń teatrdaǵy debútim. "Namys" degen spektáklde Kúshikbaı degen batyrdy somdaımyn. Kúshikbaı batyr - 20 jasar jas batyr, Ýaq taıpasynan shyqqan, aqyldy, kóbinese kúshke emes aqylǵa salyp, asyqpaı oımen sheshedi. Bul jerde endi 18-ǵasyrdaǵy oqıǵa, shyn ómirde bolǵan. Qazirgi tańda Abaı oblysynda Kúshikbaı batyrdyń bulaǵy bar», - deıdi Danıar Jetpisov.