«Taza Qazaqstan» respýblıkalyq ekologıalyq aksıasy aıasynda Túrksib jáne Jetisý aýdandarynyń turǵyndary men kolej stýdentteri senbilikke qatysty, dep habarlaıdy aqshamnews.kz
Búgin Almatyda ótken aýqymdy tazalyq sharasy Qala kúnine arnaldy.
Túrksib aýdanynda negizgi sanıtarlyq jumystar Baýma toǵaıynda júrgizildi. Senbilikke «Aıajan» kolejiniń 200-den astam stýdenti, oqytýshylar men aýdan turǵyndary qatysty. Olar birlese otyryp shamamen 100 qap qoqys jınady.
«Men ózimniń toptastarymmen jáne dostarymmen birge osyndaı sharalarǵa únemi qatysýǵa tyrysamyn. Bul — barshany biriktiretin jáne ekologıalyq mádenıetti damytýǵa sep bolatyn jaqsy dástúr», — dedi ekinshi kýrs stýdenti Ikram Ahmetjanov. Onyń aıtýynsha, ózi mundaı aksıalarǵa on retten artyq qatysqan: «Men úshin bul mektep kezinen-aq ádetke aınaldy. Eń bastysy — óz qalań men elińe qurmetpen qaraý. Keıde jaı ǵana bos bótelkeni qoqys jáshigine deıin aparyp tastaý — tazalyqqa qosqan úlesiń».
Túrksib aýdany ákimdigi apparatynyń ınspektory Osman Ýbýlovtyń aıtýynsha, mundaı sharalar aýdanda turaqty túrde ótkizilip turady.
— Biz ár senbi saıyn qoqys jınalǵan jerlerdi — saı-sala, ózen, park pen skverlerdi tazalaımyz. Adamdarda ózindik sana qalyptasýy mańyzdy: tazalyq ár aýla men ár otbasynan bastalady. Senbilik — jaı ǵana tazalaý emes, bul — qoǵamdy tárbıeleýdiń jáne biriktirýdiń mańyzdy bóligi. Bul — balalarymyzdyń bolashaǵyna qosqan úles, sebebi taza tabıǵat — elge degen qurmettiń kórinisi, — dedi ol.
Aksıaǵa balalarymen birge ata-analar da keldi.
— Men bul jerge ulym Aısultan men qyzym Aılınmen birge keldim. Balalarǵa kishkentaıynan úlgi kórsetý kerek dep oılaımyn. Ekologıalyq mádenıetti tárbıeleý — tájirıbesiz múmkin emes. Bala ózi tazalyq jumysyna qatysqanda, tazalyqtyń qundylyǵyn túsinedi, — dedi Aıgerim Ómbetalıeva.
Ekologıalyq aksıa Jetisý aýdanynda da belsendi ótti. Aýdannyń abattandyrý bóliminiń mamany Nurbol Erbolulynyń aıtýynsha, qala kóshelerin tazalaý jumystary olarda turaqty túrde júrgiziledi:
— Ár apta saıyn bizdiń brıgadalar kósheler men aýlalardy tazartady. Tek bir ǵana aýmaqtan 10 júk kóligine júk bolatyndaı qoqys shyǵardyq. Biraq turǵyndardyń sanaly kózqarasynsyz tártipti saqtaý óte qıyn, — dep qorytyndylady ol.