Almatyda eldegi eń iri ádebı festıválderdiń biri KitapFest 2025 bastaldy, dep habarlaıdy aqshamnews.kz
Ol Qala kúnine oraı uıymdastyrylyp otyr. Negizgi alań Arbat boldy: munda tańnan beri shabyt pen shyǵarmashylyqqa tolyp, pikirlesý ornyna aınaldy.
Bıylǵy festıváldiń aýqymy erekshe áser qaldyrady: 60 baspadan 10 myńnan astam kitap usynyldy. Onyń ishinde 2 myńnan astam jańa týyndylar alǵash ret kópshilikke kórsetildi. İs-shara aıasynda belgili aqyn-jazýshylarmen kezdesý ótti. Atap aıtsaq, oqyrman qaýym Sáýle Dosjan, Aqberen Elgezek, Maqsat Málik, Natalá Gorácheva, Lúdmıla Lazareva, Vasılıı Shýpeıkın jáne t.b. júzdesti. Olar týyndysyn tanystyryp, óleń oqyp, oqyrmandardyń suraǵyna jaýap berip, jastardy shyǵarmashylyqqa jeteledi.
Qonaqtardy «Jandy kitaphana» jobasy eleń etkizdi, munda Abaıdan bastap Shekspırge deıingi álemdik ádebıet klasıkteri akterlerdiń oryndaýynda «jan bitip» kórermenmen júzdesti. Balalar úshin qıal-ǵajaıyp dekorasıalar men ádebı kvestter uıymdastyrylǵan Estelik Zone aımaǵy da kóptiń kóńilinen shyqty.
«KitapFest — bul jaı ǵana kitap merekesi emes. Bul urpaqtar arasyndaǵy suhbat ornaıtyn, sózdiń qaıtadan jandy sıpatqa enetin, ádebıettiń qala ómiriniń bir bóligine aınalatyn oryn», — dedi jazýshy, Qazaqstannyń eńbek sińirgen qaıratkeri Sáýle Dosjan.
Festıvál kitap adamdardy tabystyratyn, oıdy damytatyn ári mádenı baılanysty nyǵaıtatyn keńistik ekenin taǵy bir márte dáleldedi. Almaty ádebıetti qadirleıtinin jáne ony nasıhattaýǵa jaǵdaı jasaıtynyn aıqyn kórsetti.
KitapFest 2025 qyrkúıektiń 21-ine deıin jalǵasady. Saǵat 20.00-ge deıin ashyq shyǵarmashylyq pen ádebıet álemin súıetin barsha jandy shaqyrady.