Bul myńdaǵan almatylyqqa medısınalyq kómekti jyldam ári sapaly alýǵa múmkindik beredi, dep habarlaıdy aqshamnews.kz
Aýrýhanada Profılaktıkalyq skrınıng ortalyǵy jumysyn bastady. Endi turǵyndar bir saǵat ishinde «bir tereze» qaǵıdasy boıynsha keshendi tekserýden ótip, mamandardyń keńesin ala alady. Mundaı tásil aýrýlardy erte anyqtaý men densaýlyqty saqtaýǵa aıtarlyqtaı múmkindik beredi.
Dıspanserlik naýqastarǵa erekshe kóńil bólinýde. Munda sozylmaly aýrýlardy basqarý ortalyǵy ashyldy. Onda telemedısına tehnologıalary qoldanylyp, pasıentterdiń densaýlyǵyn qashyqtan baqylaýǵa jáne úıden shyqpaı tekserýden ótýge jaǵdaı jasalǵan.
Sonymen qatar gepatologıa jáne endoskopıa ortalyǵy quryldy. Ortalyqta baýyr men asqazan-ishek joly aýrýlaryn erte kezeńde anyqtap, tıimdi em taǵaıyndaýǵa kómektesetin zamanaýı fıbroskanerleý apparaty ornatyldy.
Almatylyq LOR-mamandar hırýrgıaǵa jańa tehnologıalardy engizýde. Alǵash ret Osteomatrix bıokompozısıalyq materıalynyń kómegimen dabyl qýysyna qaıta jańǵyrtý jasaldy, bul pasıenttiń estý qabiletin saqtaýǵa múmkindik beredi. Budan bólek, Islam Alobid ádisi boıynsha muryn perdesiniń tesilý aqaýlaryna endoskopıalyq jabý tájirıbesi engizildi. Bul tásil tez ári senimdi nátıjege qol jetkizedi.
Táýlik boıy jumys isteıtin reabılıtasıa bóliminde de jańa qalpyna keltirý tehnologıasy engizilgen. Olardyń qatarynda tynys alý júıesi aýrýlary bar naýqastarǵa arnalǵan vıbroakýstıkalyq massaj jáne oıyq jaralardyń aldyn ala, kútimdi jeńildetetin fýnksıonaldy tósekter bar.
Bul jańalyqtardyń barlyǵy qalalyq medısınany damytýǵa baǵyttalǵan aýqymdy jumystyń bir bóligi bolyp tabylady. Inovasıalar, zamanaýı jabdyqtar men jańa tásilder Almatydaǵy medısınalyq kómekti ár turǵynǵa qoljetimdi, sapaly ári jaqyn etýde.