Almatyda «Taza Qazaqstan» aksıasy aıasynda Terenqur ózeniniń jaǵalaýynyń boıynda jınaý jumystary uıymdastyryldy. Bul shara megapolıstiń jalpy qalalyq tazalyq kampanıasy aıasynda Medeý aýdanynda ótti, dep habarlaıdy aqshamnews.kz
Tańerteńgi ýaqytta tazalyq jumystaryna stýdentter, mektep oqýshylary, qarapaıym qala turǵyndary qatysty. Olardyń arasynda mádenıet qaıratkerleri, sportshylar, qoǵam belsendileri men jastar qozǵalystarynyń músheleri de boldy. Mysaly, «Arqaıym» tobynyń solısi, «Almaty Áýenderi» qyzmetkeri Abzal Aryqbaev óziniń jubaıy jáne tórt jasar balasymen birge aksıaǵa qatysty.
– Biz otbasymyzben «Taza Qazaqstan» aksıasyna qatysý úshin keldik. Balaǵa ekologıalyq mádenıetti jas kezinen qalyptastyrý mańyzdy. Barlyq qazaqstandyqtardy osyndaı jaqsy sharalarǵa qatysýǵa shaqyramyn. Bul bizdiń qala men elimiz, árqaısymyz ony joǵary deńgeıge kóterý úshin kúsh salýymyz kerek, – dedi mýzykant.
Sharaǵa qatysýshylar qala tazalyǵyn saqtaý árbir azamattyń mindeti ekenin aıtady.
– Qazirgi tańda búkil Qazaqstan boıynsha «Taza Qazaqstan» aksıasy aıasynda senbilikter men basqa da sharalar ótkizilip jatyr. Almaty óte ádemi qala, sondyqtan ony taza ustaýǵa barlyǵymyz atsalysaıyq, – dedi «Almaty Áýenderi» konserttik uıymynyń ókili Dáýren Baıbóri.
Tazalyq jumystaryna almatylyq sportshylar da belsendi qatysty.
– Men Almatynyń týmasymyn, osy qalada turyp jatyrmyn, sondyqtan qalaǵa degen jaýapkershiligimdi sezinemin. Qala taza, ádemi bolsyn dep tileımin. Al ony júzege asyrý úshin biz, turǵyndar, barlyǵyn jasaýymyz kerek. Taza qala – árkimniń ortaq mindeti. Sonymen qatar, uzaq qystan keıin tabıǵat oıanyp, qoqys jınaqtalǵan jerlerdi tazalaý kerek, – deıdi Olımpıada chempıony Dmıtrıı Balandın.
Onyń qasynda kúrekterin, aıyrlary men sypyrtqylardy qoldaryna alǵan sport mektebinde oqıtyn balalar da tazalyq jumystaryna atsalysty.
– Men 7-synyp oqýshysymyn, dostarymmen jáne synyptastarymmen birge tazalyq sharasyna keldim. Qalamyzdyń taza ári ádemi bolýyna óz úlesimdi qosqym keledi, – deıdi aksıaǵa qatysýshy Eva Iakovleva.
Balalar eresekterge ilesip, belsendi jumys istedi.
– Barlyǵymyz Almatynyń taza, jaryq jáne ádemi qala bolǵanyn qalaımyz. Biz Olımpıada chempıony Dmıtrıı Balandınmen birge keldik jáne oǵan qarap ózimiz de jumys istep jatyrmyz, – deıdi 10-synyp oqýshysy Alpysbaı Abdýrahman.
Sharaǵa «Jastýr rýhy» jastar qozǵalysynyń ókilderi de belsendi qatysty. Jastar uıymynyń belsendisi, QazUPÝ fılologıa fakúltetiniń 4-kýrs stýdenti Ábdikamal Alsyn ótken jyly «Jastýr rýhy» uıymynyń 150-den astam ókili ekologıalyq sharalarǵa qatysqanyn aıtty.
– Kóktemniń kelýimen biz, ýnıversıtetter men kolejderdiń stýdentteri, qalamyzdy tazartý sharalaryna belsene qosyldyq. Sonymen qatar, oqý ýaqytynan bos kezde ekopatrýlder jumysyna qatysyp, qoqys oryndary men ákimshilik buzýshylyqtardy anyqtap, qajetti sharalardy qabyldaımyz, – dedi Ábdikamal Alsyn.
Eske sala ketsek, «Almaty – bizdiń ortaq úıimiz» kampanıasy aıasynda megapolıs aýdandarynda parkterdi, skverlerdi, ózen alqaptaryn tazartý jumystarymen qatar basqa da ekologıalyq sharalar uıymdastyrylyp jatyr.