2025 jyly 17-24 naýryz aralyǵynda Almatyda «Almaty – ortaq úıimiz» qalalyq naýqany jáne «Taza Qazaqstan» baǵdarlamasy aıasynda úshinshi tazalyq aptalyǵy ótedi. «Taza aýlalar» ataýymen ótetin bul sharalar 4 myń aýlany kórkeıtýge, turǵyn úılerdiń sanıtarlyq jaǵdaıyn jaqsartýǵa jáne qalany kógaldandyrýǵa baǵyttalǵan.
Apta barysynda qalany taza ári jaıly etýge arnalǵan birqatar is-shara ótedi. PIK (páter ıeleri kooperatıvteri) kúshimen 9 myńnan astam turǵyn úıde tazalyq jumystary júrgiziledi: jertóleler jeldetilip, qoqys pen antısanıtarlyq oshaqtar joıylady. Sonymen qatar, osy aptada «Úzdik komýnaldyq qyzmetker» baıqaýynyń qorytyndylandy, jeńimpazdar aýlalardy kórkeıtýge qosqan úlesi úshin marapattalady.
Kógaldandyrý jumystary jalǵasady: qýraǵan butaqtar men usaq qýraǵan aǵashtar kesilip, oryndyqtar syrlanyp, jańa qoqys jáshikteri ornatylyp, 1454 qoqys konteıner alańy tazartylady. Sonymen birge, turǵyndar «Qorshaýyńdy/oryndyqty boıa» aksıasy aıasynda aýlalyq nysandardy jańartýǵa qajetti boıaýlardy ala alady. «Jaqynyńa járdemdes» atty áleýmettik aksıa aıasynda eriktiler jalǵyzbasty zeınetkerler men múmkindigi shekteýli jandardyń jeke úıleriniń aýmaǵyn tazalaýǵa járdemdesedi.
Tazalyq aptalyǵy aıasynda aryqtardy tazalaý, qoqys jınaý, shaǵyn sáýlettik pishinderdi, balalar jáne sport alańdaryn qalpyna keltirý jumystary júrgiziledi. Sondaı-aq, jol belgilerin jýý jáne jóndeý, aýla joldaryn aǵymdaǵy jóndeý jumystary qolǵa alynady. Buǵan qosa, aýlalarda 100 aǵash pen buta otyrǵyzylady.
Baıqaý aıasynda eń úlgili kórkeıtilgen medısınalyq uıym aýmaǵy anyqtalady. Al mektep oqýshylary bolashaq kógaldandyrý jumystary úshin kóshetterdi daıyndaý aksıasyna qatysady.
19 naýryzda Almatyda «Taza Qazaqstan» baǵdarlamasy aıasynda «Jasyl Naýryz» ekologıalyq festıvali ótedi. Qala turǵyndary ekologıa týraly dárister tyńdap, qaıta óńdelgen plasıkten jasalǵan ónimderdi kóre alady, sondaı-aq, sheberlik dáristerine qatysyp, plasıkalyq qaqpaqtardy velosıped shrederinde usaqtap kórýge múmkindik alady. Festıváldiń mańyzdy bóligi – ınklúzıa: erekshe qajettiligi bar balalar qaıta óńdelgen plasıkten oryndyqtar men ústelder jasaýǵa atsalysady. Keıin bul buıymdar MEGA SOO-na ornatylady.
23 naýryzda Naýryz merekesi aıasynda ótetin «Tazarý kúni» – «Taza Almaty – Naýryzǵa syı» atty jalpyqalalyq senbilikte myńdaǵan qala turǵyny aýlalardy, kósheler men saıabaqtardy tazartýǵa shyǵady.
«Almaty – ortaq úıimiz» naýqany ekologıalyq sana-sezimdi arttyrýǵa jáne qala turǵyndarynyń qorshaǵan ortaǵa jaýapkershilikpen qaraýyn qalyptastyrýǵa baǵyttalǵan.