Móldir MAILYBAEVA, M.Mámetova atyndaǵy №28 mektep-lıseıiniń qazaq tili men ádebıeti pániniń muǵalimi:
– Táýelsizdik – kez kelgen adamnyń, ulttyń, halyqtyń, eldiń erkindigi. Táýelsizdik – eń aldymen Qazaq halqynyń bostandyqqa umtylǵan asqaq armandary men qaısar rýhynyń jemisi dep bilemiz. Osynaý erkindigimizdiń arqasynda ustazdyq qyzmetti tańdap, bilim baǵytyna bet burdym. Táýelsizdiktiń 30 jylynda «Bilim týraly» úsh zań qabyldanypty. 1992, 1999, 2007 jyldary bilim berý júıesiniń qurylymy IýNESKO-nyń halyqaralyq standarttyq qurylymyna sáıkestendirilgen.
Jyl ótken saıyn barlyq salaǵa ózgerister men tolyqtyrýlar engiziletini belgili. Sondyqtan da bolar biz úshin Táýelsizdik kúni – eń qasterli kún. Osynaý jyldar ishinde egemen elimiz álemdik arenada ózindik ornyn taba bildi. Qazaqstan Respýblıkasy damyǵan elder qataryna enip, halyqaralyq qatynasy, turǵyndardyń turmys-tirshiligi, ekonomıkalyq-áleýmettik jaǵdaıy ońaldy.
Búgingi kúni muǵalimderdiń arasynda qaǵazbastylyq joıyldy. Eldegi epıdemıologıalyq jaǵdaıǵa baılanysty oqýshylarǵa barynsha jaǵdaı jasalyp, bilim júıesi jaqsara tústi. Almatynyń ózinde bıylǵy oqý jylynda alpys myńǵa jýyq kompúter alynyp, muǵalim men oqýshylarǵa taratyldy.
Qala ákimdigi qarjy bólip, qaladaǵy barlyq oqýshyny oqýlyqpen tolyq qamtamasyz etti. Odan bólek, bilim salasyna kóńil bólinip, Prezıdenttiń tapsyrmasymen muǵalimderdiń jalaqysy da kóbeıip jatyr.
Bıyldan bastap pedagogıka salasynda oqıtyn bolashaq muǵalimderdiń shákirtaqysy 42 myń teńge boldy. Nyq qadam jasap, keleshekte ustaz bolý — úlken mártebe deıtin kúnge jetkeli turmyz. Sapaly bilim berilýi úshin Bilim jáne ǵylym mınıstrligi 25 joǵary oqý ornyn lısenzıasynan aıyrdy.
Árıne, ártúrli sala boıynsha qarady. Osylaı-osylaı, «dıplom saýdasy» da toqtaryna senemin. Sebebi bul máseleni Prezıdenttiń ózi birneshe ret kóterdi, mınıstrlik te soǵan saı jumys istep jatyr.
Táýelsiz eldiń táýelsiz oılaı biletin jastaryna tárbıe men bilimdi qatar beretin qurmetti ustazdardyń mereıi ústem bolyp, egemen elimizde bilimdi jastardyń sany artsa deımin.