Kereký óńirinde qaıyrymdy tirlik boldy
Búgin Kerekýde ótken «Qaıyrymdy ister marafonynyń» qorytyndysyna arnalǵan saltanatty sharada QR Aqparat jáne qoǵamdyq damý mınıstri Aıda Balaeva Qazaqstan Prezıdenti Qasym-Jomart Toqaevtyń jalpyulttyq is-sharaǵa belsendi qatysqan azamattarǵa úndeýin oqyp berdi, dep habarlaıdy Almaty-akshamy.kz
«Bul – halqymyzdyń asyl qasıetterin dáriptep, kópshilikti jaqsylyq jasaýǵa jumyldyratyn jalpyulttyq joba. Mereıli jylda elimizde qoǵamdyq mańyzy bar naqty jumystar atqarylýda. Osy marafon – sonyń jarqyn mysaly. Volonter jylyndaǵy ıgilikti ister jalǵasyn taýyp, dástúrge aınalǵanyn kórsetedi. Shyn máninde, qıyndyqqa tap bolǵan adamǵa qamqorlyq jasaý – qanymyzda bar qasıet», - delingen Memleket basshysynyń úndeýinde.
Saltanatty sharaǵa QR Aqparat jáne qoǵamdyq damý mınıstri Aıda Balaeva, Pavlodar oblysynyń ákimi Ábilqaıyr Sqaqov, Parlament depýtattary, ortalyq jáne jergilikti atqarýshy organdardyń, óńirlik jáne respýblıkalyq ÚEU ókilderi, halyqaralyq uıymdardyń, sarapshylar qaýymdastyǵynyń jáne BAQ ókilderi qatysty.
«Marafonǵa 1200 ÚEU men volonterlik uıym, 300-den astam bilim berý uıymy, 360 ujym men kásipodaq qatysty. Ujymdar men komersıalyq uıymdardyń qaıyrymdylyqqa jibergen jalpy somasy 6,2 mlrd teńgeni qurady», - dedi A.Balaeva óz sózinde.
Mınıstr Prezıdenttiń bastamasyn qoldaý isinde erekshelengen jáne ózgelerge aıryqsha úlgi bolǵan óńirlerdi atap ótti.
«Barlyq kórsetkishter boıynsha bul: Pavlodar, Shyǵys Qazaqstan, Qaraǵandy jáne Aqmola oblystary», - dedi A.Balaeva.
Sondaı-aq, is-shara barysynda Pavlodar oblysynyń ákimi Ábilqaıyr Sqaqov, Parlament Májilisiniń depýtaty Vera Kım sóz sóıledi.
Marafonnyń jabylýy aıasynda «Eń meıirimdi» baıqaýynyń jeńimpazdary, sondaı-aq qaıyrymdylyq salasynda mańyzdy qyzmetti júzege asyratyn uıymdardy anyqtaý, taný jáne kótermeleý úshin jyl saıyn ótkiziletin «Jomart júrek» qaıyrymdylyq syılyǵynyń laýreattary marapattaldy.