Árbir memlekettiń asa mańyzdy qundylyǵy bolyp sanalatyn táýelsizdiktiń jarqyn jetistigi – eldegi beıbit ómir men qoǵamdaǵy turaqtylyq ekeni anyq.
Bodandyqtan, otarlyq ezgiden rýhy janshylyp, jigeri jasyǵan halqymyzdyń ǵasyrlar boıǵy arman-ańsary erkindik, egemendik boldy. Osy asyl murat, asqaq arman jolynda qanshama qan tógildi, qazaqtyń qońyraýly naızaly qanshama qaısar erleri «tebingisi terge shirip, terligi maıǵa erip» at ústinde kún keshti!..
Ras, odan bertindegi KSRO Konstıtýsıasynda «Árbir odaqtas respýblıka KSRO quramynan erkin shyǵý quqyna ıe» degen bap boldy. Biraq is júzinde Odaq quramyndaǵy respýblıkalardyń eshqaısysy totalıtarlyq júıedegi «qyzyl ımperıa» quramynan óz erkimen shyǵyp kete almaıtyn. Al negizgi zańdaǵy atalǵan bap sovettik ıdeologıanyń bir kórinisi ǵana edi. Óıtkeni, sovet azamatynyń komýnıstik partıa saıasatyna kúmán keltirýine jol berilmeıtin. Solaı bolyp kelgen...
Dinmuhamed Ahmetuly Qonaevtyń respýblıka basshylyǵynan alynyp,
ornyna Gennadıı Kolbınniń taǵaıyndalǵanyna narazylyq retinde 1986
jyly 16 jeltoqsanda Almaty jastarynyń alańǵa shyǵýy Ortalyq bılik
úshin kútpegen jaǵdaı boldy. Tarıhqa «Jeltoqsan kóterilisi» degen atpen
engen bul oqıǵa totalıtarlyq júıege aýyr soqqy bolǵanyn, túrli múddeni
kózdeıtin toptardy bir ýysta ustap turýǵa endigi jerde sovettik ıdeologıa
dármensiz ekenin odan keıingi jyldary bolǵan ózgerister dáleldep berdi. Osynyń bári «sosıalızm jumaǵyn» ornatýǵa umtylǵan alyp ımperıanyń bir sátte ýtopıaǵa aınalyp, munyń sońy jańa 15 memlekettiń paıda bolýymen aıaqtaldy.
«Alda úlken toı bolady, keler urpaq bizge ıa qarǵys, ıa alǵys aıtady. Túptiń túbinde biz óz memleketimizdi quramyz» degen nyq senimde bolǵan Alashordashylardyń asyl muraty araǵa 70 jyl salyp baryp, órimdeı ul-qyzdyń yzǵarly jeltoqsanda «muzǵa jaqqan alaýyna» ulasty. Ult táýelsizdiginiń alǵyshartyndaı sol Jeltoqsan oqıǵasy ǵazız babalarymyzdyń keshegi býlyqqan armanynyń ólmeı-óshpeı urpaqqa jalǵasyp, ómirsheń rýhtyń atoılap alǵa shyǵýyna negiz bolǵanyn kórsetti.
Tabandy da tegeýrindi kúres nátıjesinde qazaq aspanynda erkindik, teńdik tańy atty. Egemendik týraly qujat ult táýelsizdigin baıandy etken tuńǵysh zańnamalyq akt boldy. Syrtqy saıasatta óziniń múddelerin aıqyndap, halyqaralyq uıymdardyń qyzmetine qatysý múmkindigine qol jetkizgen elimiz, egemendik Deklarasıasy arqyly tabıǵı baılyǵyn, ekonomıkalyq jáne ǵylymı-tehnıkalyq áleýetin tolyq óz menshigine aldy. Ortalyqqa baǵynyshty kúıden arylyp, alys-jaqyn memlekettermen teń áriptes retindegi yntymaqtastyqqa qol jetkizdi. Ulttyq rámizder bekitilip, tól teńgemiz aınalymǵa shyqty, ásker qurý, shekarany belgileý, syrtqy saıasatty aıqyndaý sekildi kúrdeli máseleler sheshimin tapty.
Odan bólek, óziniń biregeıligin joǵalta bastaǵan halyq es jıyp, joǵyn túgendeı bastady, óziniń tól mádenıetin túletip, ádet-ǵurpyn, salt-sanasyn ulyqtaýǵa kóshti, dilin, dinin tórge ozdyrdy, óz tilinde ımenbeı sóıleýge, qazaqsha oılaýǵa, qazaq bolýǵa múmkindik aldy. Ult retinde eńsesi kóterildi. Táýelsizdiktiń eń úlken syıy da – osy, ıaǵnı ata-babalarymyzdyń san ǵasyrlardan bergi armanynyń júzege asqany boldy.
Búginde Qazaqstan – álemniń 184 elimen dıplomatıalyq qarym-qatynas ornatqan, halyqaralyq arenada óz orny bar derbes memleket. Sońǵy 30 jylda mıllıonnan astam etnıkalyq qazaq shetelden elge oraldy. Táýelsizdik qarsańynda elimizdegi qazaqtardyń úles salmaǵy 40 paıyzǵa da jetpeıtin. Al búginde Qazaqstan halqynyń 70,7 paıyzy – qazaqtar. Bul da – Táýelsizdiktiń arqasy.
Qoryta aıtqanda, Táýelsizdik – bireýler oılaǵandaı, kókten túsken syı, ońaı kelgen olja emes. Ol – eń qasıetti, qasterli qundylyq, ulttyń uly baılyǵy. Ony kózdiń qarashyǵyndaı qorǵaý, memlekettilikti, ishki tutastyq pen bereke-birlikti saqtaý – taǵdyryn osy elmen, jermen baılanystyrǵan ár adamnyń paryzy.