1991 jyly 16 jeltoqsanda «Qazaqstan Respýblıkasynyń memlekettik táýelsizdigi týraly» Konstıtýsıalyq zańy Almaty qalasynda qabyldanyp, jańa Táýelsiz memleketimiz – Qazaqstan Respýblıkasynyń paıda bolǵany týraly kúlli álemge jarıa etildi.
Elbasy «Táýelsizdik taǵylymy» atty maqalasynda eldiktiń qalyptasýyndaǵy bastaý bulaǵy sanalatyn dál Almaty qalasynda memlekettik mańyzdy oqıǵalardyń birneshe márte oryn alǵanyn ózi de atap ótti. Mysaly, 10 jeltoqsan - Nursultan Nazarbaev eldiń aldynda halyq saılaǵan Tuńǵysh Prezıdent retinde ant bergen kún. Sondaı-aq, sol kúni osydan dál 30 jyl buryn Qazaq KSR-in Qazaqstan Respýblıkasy dep qaıta ataý týraly sheshim de Almatyda qabyldandy. Búginde Almaty Elbasy jeke ózi ataǵan «Táýelsizdiktiń altyn besigi» atty qurmetti ataǵyn abyroımen kóterip kele jatyr.
Táýelsizdik rýhymyzdy kóterip, bolashaqqa degen senimimizdi nyǵaıtty. Ata-babalarymyz salǵan joldyń tarıhı taǵylymy bizge ıgiliktiń negizi – halyqtyń birliginde ekenin aıqyn kórsetti. Taǵdyrdyń jazýymen qazaq jerine tamsanǵan túrli ult pen din ókilderiniń tatýlyǵyn, kelisimi men dostyǵyn óz órkendeýimizdiń altyn kilti retinde tańdap, biz bolashaqqa senimmen qadam bastyq. Bul Qazaqstan halqyn buryn-sońdy bolmaǵan bıikterge kóterdi.
Táýelsizdik mereıtoıy – elimizdiń táýelsizdik jyldary qol jetkizgen tabystaryn zerdelep, kemel keleshekke jańa baǵdar túzetin kezeńdik oqıǵa. Atalǵan kezeńde taǵdyrsheshti ról atqarǵan birden bir tulǵa – bizdiń Ult Kóshbasshymyz. Atadan qalǵan asyl sóz demekshi, bul maqalada Nursultan Ábishuly Nazarbaev ótkenge kóz júgirtip, óskeleń urpaqqa tarıhymyzdy umytpaýdy eskertip, sanamyzǵa jańadan serpin berdi.
Meıirjan Otynshıev,
Nur Otan partıasy Almaty qalalyq fılıaly tóraǵasynyń birinshi orynbasary