Jýrnalıser kúni qarsańynda
Qazaqstandaǵy BAQ ókilderiniń kásibı merekesi qarsańynda «Alataý Aqparat» JSHS-ine qarasty «Almaty aqshamy» jáne «Vechernıı Almaty» ujymy taýǵa shyǵyp, meıramdy tabıǵat aıasynda atap ótti. Bul jaı ǵana demalys emes, aǵa býyn men jas jýrnalıser arasyndaǵy rýhanı áńgime, tájirıbe almasý, tárbıelik máni zor basqosý boldy.
Bilikti basshy Tólemis Baqtybaıuly basqaryp otyrǵan «Alataý Aqparat» ujymynyń merekelik basqosýyna Qazaqstan Jýrnalıser akademıasynyń akademıgi Saǵymbaı Qozybaev, sondaı-aq Valerıı Jandáýletov, Maǵaýıa Nurǵalıev syndy ardager jýrnalıser arnaıy qonaqqa keldi. Olar redaksıa ujymyn kásibı merekemen quttyqtap, ózderiniń aǵalyq izgi tilekterin bildirdi.
Almaty mańyndaǵy Túrgen shatqalynyń «Batan» demalys ornynda ótken ujymdyq demalys kezinde jyl boıy tynbaı eńbek etken úzdik qyzmetkerler arnaıy syılyqtarmen, dıplomdarmen marapattaldy. Marapatqa ıe bolǵan áriptesterimizdiń arasynda «Almaty aqshamy» gazetiniń fototilshisi Samat Qusaıynov pen jas tilshi Aqtolqyn Turlyǵazynyń eńbekteri elenip, olarǵa Qazaqstan Jýrnalıser akademıasynyń arnaıy dıplomy tabys etildi.
«Bizdiń judyryqtaı jumylǵan ujymymyzdyń árbir qyzmetkerin kásibı merekemizben quttyqtaımyn! Redaksıada qyzmet etip júrgen ár adamnyń ózindik orny bar. Jumystan tys kezde osylaı merekelik kóńil kúımen bas qosyp turýymyz birligimizdi nyǵaıta túsedi dep oılaımyn. Janǵa jaıly demalys shyǵarmashylyǵymyzǵa da oń áserin tıgizedi», – dedi «Alataý Aqparat» JSHS dırektory Tólemis Baqtybaıuly.
Myń jasaǵan shahardyń qos gazetinde eńbek etip kele jatqan ardager jýrnalıser, redaksıanyń tabaldyryǵyn jańa attaǵan jas qalamgerler, gazettiń ystyǵyna kúıip, sýyǵyna tońatyn basqa da qyzmetkerler bas qosyp, esten ketpes ádemi demalys ótkizdi.
Tamyljyǵan tabıǵatta án de aıtylyp, bı de bılendi, túrli oıyndar uıymdastyryldy. Taýdaǵy belsendi demalysty táýir kóretin keıbir áriptesterimiz taý bókterin aralap, «Qaıraq» sarqyramasyna deıin jaıaý júrip qaıtty. Taýdyń samaldy keshinde alaý jaǵylyp, shoqqa kartop ta pisirildi. Tabıǵattaǵy saf aýany jutyp, túngi aspandaǵy juldyzdarǵa qarap, sýdyń sarqyraǵan daýysy men qustardyń ánin tyńdap, shatyrda qonýdyń ózi keremet.
«Alataý Aqparat» ujymy jýrnalıserdiń kásibı merekesin tabıǵat aıasynda ótkizýdi dástúrge aınaldyrdy. Ujym byltyr da «Tuıyq sý» demalys ornynda demalyp qaıtqan edi.
Saǵymbaı QOZYBAEV, Qazaqstan Jýrnalıser akademıasynyń prezıdenti:
Jýrnalısıkaǵa júrekpen kel!
«Almaty aqshamy» jáne «Vechernıı Almaty» gazetteri – elimizdegi aqparat keńistigindegi ózindik orny bar, turaqty oqyrmany bar bedeldi basylymdar. Osy basylymdarda qazaq jýrnalısıkasynyń korıfeıleriniń birazy eńbek etti. Qazir baıqap otyrǵanymdaı, gazette jumys istep júrgen jastardyń qatary kóbeıipti. Jalpy, jýrnalıserdiń eńbek jolyn gazetten bastaǵanyn quptaımyn, bul – úlken mektep. Jýrnalısıka – ǵylym. Men únemi aıtyp júremin, jýrnalısıkaǵa mamandyǵyńdy jaqsy kórip, júrekpen kelý kerek. Sonda ǵana adaldyq bolady. Bizdiń akademıa jylda jýrnalısıkanyń ár salasynda júrgen myqty mamandardy marapattaıdy. Solardyń arasynda osy qos gazettiń jýrnalıseri nazardan tys qalǵan emes. Saýatty, bilimdi, jan-jaqty jýrnalıserdi qalyptastyrýda gazet basshylyǵynyń, jalpy ujymnyń yqpaly kúshti ekenin aıtqym keledi. Aldaǵy ýaqytta da alar asýlaryńyz bıik bolsyn degim keledi. Barsha jýrnalıser qaýymyn kásibı merekemizben quttyqtaımyn!
Valerıı JANDÁÝLETOV, ardager jýrnalıs, baspager:
Jastarǵa izdenis kerek
Men jýrnalısıka salasynda jarty ǵasyrǵa jýyq qyzmet etip kelemin. Jýrnalısıka maǵan búkil álemdi tanýǵa, táýelsiz Qazaqstannyń qalyptasý tarıhyna kýá bolýǵa múmkindik berdi. Qazirgi zamanda jýrnalıserdiń alańsyz jumys isteýine barynsha jaǵdaı jasalýda. Sondyqtan ózderiniń barlyq múmkindigin paıdalanyp, kóp izdenýi kerek dep oılaımyn. Jastarymyz tek Qazaqstan sheńberinde ǵana emes, halyqaralyq deńgeıde suranysqa ıe jýrnalıs bolsa eken dep tileımin. Kásibı mereke qutty bolsyn, áriptester!
Maǵaýıa NURǴALIEV, fotograf, ardager jýrnalıs:
Fotoǵa túsirý de – ǵajap óner!
Baspasóz salasyndaǵy fotojýrnalıstıkanyń orny erekshe ǵoı. Sýreti sóılep turatyn mamannyń jumysy qashan da baǵaly. Qazirgi tańda kásibı fotoónermen qosa elektrondyq tehnıkanyń, gadjetterdiń paıda bolýymen basylymdardyń kóbi sýretti ǵalamtordan izdeıtini ras. Biraq menińshe, tipti qarapaıym qalta telefonymen sýretke túsirý úshin de ıkem kerek. Sondyqtan qazirgi jas jýrnalıserge mátin jazýmen qatar sýretke túsirýdi, sapaly foto jasaýdy úırenip alý artyq bolmaıdy. Óıtkeni, qazirgi aqparattyq zamanda jan-jaqtylyq kerek. Barsha áriptesterimdi, qalam ustaǵan jýrnalıser qaýymyn osynaý keremet merekemen quttyqtaımyn. Shyǵarmashylyq tabystarǵa jete berińizder!
