Almatyda «Rýhanı kelisim kúnine» oraı spartakıada ótti
Jaqyn kúnderi elimizde «Rýhanı kelisim kúni» toılanǵan bolatyn. Bul kún - elimizdegi ártúrli ulttar men dástúrli dinderdiń arasyndaǵy aýyzbirshilik pen tatýlyqtyń, tynyshtyq pen turaqtylyqtyń, beıbitshilik pen yntymaqtyń merekesi. Tatýlyqty tý etken merekeniń qurmetine oraı keshe Almaty qalasy Din isteri jónindegi basqarmanyń basshylyǵymen «Ulttyq mura» baǵdarlamasy aıasynda Almatyda kezekti spartakıada ótti.
Buqaralyq-sporttyq sharanyń shartyna sáıkes 16 jastan asqan Almaty qalasynyń turǵyndary qatysýǵa múmkindik aldy. Atalǵan shara barysynda qatysýshylar: arqan tartý, armrestlıng, gir tasyn kóterý, qoshqar kóterý, asyq atý, mını-fýtbol sekildi sport túrlerinen baq synady.
Jınalǵan jamaǵattyń nazaryn ózine aýdarǵan – «Qoshqar kóterý» saıysy boldy. Óıtkeni jeńimpaz atanǵan balýan qoshqardy jetektep qaıtady. Báske eki birdeı qoshqar tigilip jınalǵan kópshiliktiń óz baqtaryn synap kórýlerine múmkindik berildi. Alǵashqy topta Aıdyn Nuǵymanov 54 ret kóterip jeńiske jetse, ekinshi toptan Baýyrjan Ábdiqaıymov eshkimge des bermedi. Ol tipti eki mınýt ishinde 58 ret kóterdi.
«Birinshiden osy sapartakıadany uıymdastyrǵan qalalyq Din isteri jónindegi basqarma basshylyǵyna jáne «Ulttyq mura» baǵdarlamasyna alǵysymdy aıtamyn. Ózim «qoshqar kóterý» saıysynda jeńimpaz boldym. Keshe ǵana Almaty oblysynda ótken jarysta ýaqyt shekteýsiz bolyp 1115 ret kótergen edim. Bul joly 2 mınýt qana berilgendikten 58 ret kóterdim. Osyndaı sporttyq sharalar jıi ótkizilip tursa, qala halqynyń salaýatty ómir saltyn ustanýyna jáne densaýlyqtarynyń myqty bolýyna yqpal etedi», - dedi spartakıada jeńimpazy Baýyrjan Ábdiqaıym.
Gir tasyn kótergen bilekti jigitter de kópshilikti tamsandyrdy. Tasty 101 ret áýeletken Aıdyn Nuǵymanov bas júldeni ıelense, 72 ret kótergen Abzal Tileýbaev ekinshi orynǵa turaqtady. Júldeli úshtikti 71 ret kótergen Saıfýlla Malıkov túıindedi.
Arqan tartqanda uıymshyldyq tanytqan «Asqar» tobynyń apaıtós jigitteri top jardy. Fınalda ese jiberip alǵan «Qudaıbergen» toby 2-oryn, al «Zará» toby 3-orynǵa turaqtady.
Ulttyq oıyn – asyq atýda mergendigimen kózge túsken Dıas Serikbaev jeńimpaz boldy. Al bilekti jigitterdiń básekesi – armrestlıngte Abzal Tileýbaev myqty ekenin dáleldedi.
Fýtbol týrnırinde 28 komanda óner kórsetti. Toptyq kezeńnen de, pleı-oof oıyndarynan da múdirmeı ótken «Alǵabas» pen «Arlan» komandalary bas júldeni ózara sarapqa saldy. Tartysty ótken fınaldyq oıynda «Alǵabas» fýtbolshylary jeńiske jetip, chempıon atandy. Al, júldeli úshtikti «İle-Alash» komandasy túıindedi.
Jarys sońynan jeńimpazdar men júldegerler uıymdastyrýshylar taǵaıyndaǵan baǵaly syılyqtarmen marapattaldy.
Sharanyń negizgi maqsaty da meshit jamaǵaty arasynda dene shynyqtyrý men sportty, salaýatty ómir saltyn nasıhattaý. Sonymen qatar ıslamnyń dástúrli emes aǵymynyń jeteginde júrgen jandarǵa asyl dinniń oń jolyn kórsetý.