Tátti sýsyndardyń ólimge ákeletin qaýpi anyqtaldy.
Vashıngton ýnıversıtetiniń ǵalymdary 30 jyl boıy júrgizgen zertteý nátıjesinde tátti gazdalǵan sýsyndardy turaqty tutyný aýyz qýysy obyrynyń damý qaýpin edáýir arttyratynyn anyqtady, dep habarlaıdy aqshamnews.kz.
Zertteý barysynda 162 602 áıeldiń derekteri taldanǵan. Nátıjeleri JAMA Otolaryngology — Head & Neck Surgery jýrnalynda jarıalandy.
Kúnine kem degende bir porsıa tátti sýsyn ishetin áıelderdiń aýyz qýysy obyryna shaldyǵý qaýpi aıyna bir retten az ishetinderge qaraǵanda 5 esege jýyq joǵary ekeni anyqtaldy. Ásirese, temeki shekpeıtin jáne alkogóldi az tutynatyn áıelder arasynda bul kórsetkish tipti 5,46 esege artqan.
Zertteý nátıjesinde tátti sýsyndardyń aýyz qýysynyń ártúrli bólikterine jaǵymsyz áser etetini belgili boldy. Gazdalǵan sýsyndardy jıi tutynatyn adamdarda til isigi 4,5 esege, al aýyz qýysynyń basqa bólikterinde isiktiń paıda bolý qaýpi 5,24 esege joǵary.
Ǵalymdar buryn aýyz qýysy obyrynyń negizgi sebepteri retinde temeki shegý men alkogóldi tutyný qarastyrylǵanyn, biraq jańa derekter tátti sýsyndardy shamadan tys tutyný da onkologıalyq aýrýlardyń qaýpin arttyratynyn kórsetkenin aıtady.
Endi zertteýshiler onkologıalyq aýrýlardyń damýyna túrli dıetalyq ádetterdiń áserin naqtylaý úshin aýqymdy zertteýler júrgizý qajettigin alǵa tartyp otyr.