Sý tasqynynan zardap shekken óńirlerde salyq mindettemesin oryndaý merzimin uzartý týraly
Búgin Qazaqstan Respýblıkasynyń Qarjy mınıstri «Qazaqstan Respýblıkasynyń óńirlerinde sý tasqynynan zardap shekken adamdar úshin salyqtyq ákimshilendirýdi retteýdiń ózge tártibin belgileý týraly» buıryqqa qol qoıdy, dep habarlaıdy almaty-akshamy.kz.
Buıryq jarıalanǵan ýaqyttan bastap qoldanysqa enedi. Qujat tótenshe jaǵdaı rejımi jarıalanǵan óńirlerde sý tasqynynan zardap shekken adamdar úshin salyq mindettemelerin oryndaý merzimin uzartý maqsatynda ázirlendi. Jeńildikterdi ákimdikterdiń sý tasqynynan zardap shekkenderdiń tizimine engizilgen salyq tóleýshiler qoldana alady. Atalǵan tulǵalar úshin 2024 jylǵy 1 shildege deıin:
- tóleý merzimi 2024 jylǵy 1 naýryzdan 30 maýsymǵa deıingi kezeńde bastalatyn, barlyq salyq jáne búdjetke tólenetin basqa da mindetti tólemder, sondaı-aq áleýmettik tólemder boıynsha tóleý keıinge qaldyryldy;
- 2024 jylǵy 1 naýryzdan bastap 30 maýsymǵa deıingi kezeńde bastalatyn salyq eseptiligin tapsyrý merzimderi aýystyryldy;
- merziminde oryndalmaǵan salyq mindettemesiniń oryndalýyn qamtamasyz etý jáne salyq bereshegin májbúrlep óndirip alý sharalaryn qabyldaý toqtatyla turady;
- oryndaý merzimi 2024 jylǵy 1 naýryzdan bastap 30 maýsymǵa deıingi kezeńde bastalatyn, kameraldyq baqylaý nátıjeleri boıynsha habarlamany oryndaý merzimi uzartyldy.
Sondaı-aq, salyqtyq tekserýler (keshendi, taqyryptyq, qarsy, hronometrajdyq zerttep-qaraý) toqtatyla turady, bul rette toqtata turý merzimi tekserý merzimine jáne talap qoıý merzimine kirmeıdi. Sonymen qatar zardap shekken adamdarǵa qatysty jańadan salyqtyq tekserýdi taǵaıyndaýdy toqtata turý kózdelgen. Odan bólek, ýaqytyly tólenbegen salyqtar boıynsha 2024 jylǵy 1 naýryzdan 1 shildege deıin ósimpuldy esepteý toqtatyla turady.
Atalǵan ózgerister 2024 jylǵy 1 naýryzdan bastap týyndaǵan quqyqtyq qatynastarǵa qoldanylady. Salyq tóleýshilerge memlekettik kirister organdaryna barýdyń qajeti joq, zardap shekkenderdiń tizimi ákimdikterden alynady.