Qazaqstan, Ózbekstan, Ázerbaıjan jáne Grýzıanyń saqtandyrý salasyndaǵy ortaq áleýeti artty.
Tashkentte 4 memlekettiń ókilderi bas qosyp, «Turan» memorandýmyna qol qoıdy. Qujat halyqaralyq qaıta saqtandyrý syıymdylyǵyn 45 mln dollarǵa deıin jetkizýge múmkindik beredi. Keler jyly bul kórsetkishti 100 mıllıon dollarǵa jetkizý oıda bar. Igi iske Ortalyq Azıa men Kavkaz elderiniń jetekshi kompanıalary qosyldy, dep habarlaıdy almaty-akshamy.kz 24.kz-ke silteme jasap.
Jalpy atalǵan damýshy naryqta arzan ári sapaly saqtandyrýǵa suranys ósip keledi. Osy sebepti qarjylyq qyzmetti retteýshi mekemeler bul iste birigýdi jón dep tapqan. Ol úshin birkelki baǵa saıasatyn engizip, kórsetiletin qyzmet pen sapany úılestiredi.
Mamandardyń aıtýynsha, Qazaqstan kompanıalary endi qymbat sheteldik saqtandyrý polısin emes, tıimdi shart aıasynda otandyq ónimge qol jetkize alady. Memorandýmǵa aldaǵy ýaqytta Túrkıa, Qyrǵyzstan Tájikstan jáne Túrikmenstan qosylýǵa nıetti.
Qaısar Ábdir, saqtandyrý kompanıasy basqarma tóraǵasynyń mindetin atqarýshy: - Eger jeke nemese zańdy tulǵa bıznesin halyqaralyq naryqta keńeıtýdi oılasa, memorandýmǵa qatysýshy eldegi kompanıanyń biryńǵaı sharttaryn qoldana alady. Bul oǵan aıtarlyqtaı paıda ákeledi. Eger ortasha eseppen 25 myń dollardyń jeke múlkin saqtandyrý qajet bolsa, bir jyldyq tólem bar bolǵany 25 dollardyń shamasynda bolady.