Taıaý jyldary Saýd Arabıasynda sý ústinde júzip júrgen tasbaqaǵa uqsas úlken shahar, ıaǵnı ıahta paıda bolatyn kórinedi.
Ol qalanyń aty da belgili – «Pangeos» (Pangeos) dep atalmaq. Muhıt ústinde ústemdik quratyn tasbaqa-qala baqandaı 8 mlrd dollarǵa turǵyzylmaq. Oǵan 60 000 adamǵa deıin syıyp ketedi. İshinde adam janyna kerektiniń bári tabylmaq. Tamaq ta ishesiz, súıiktińizben otyryp kofe de urttaısyz, kıim-keshek dúkenderin aralaısyz, kitaphanaǵa, kınoteatrǵa da barasyz, baqta serýendeısiz degendeı.
«Pangeos» qurylysy aıaqtalǵan kúni ol jahandaǵy júzgish biregeı, jalǵyz nysan bolmaq. Onyń uzyndyǵy 550 metr, al eni tasbaqanyń qanatyn esepke alǵanda 610 metr bolmaq. Erekshe nysandy turǵyzýdy qolǵa alǵan mamandar segiz jylda qoldanysqa beremiz dep senimdi aıtyp otyr.
Árqaısysynyń kúshi 16 800 l.s. bolatyn 9 HTS qozǵaltqyshymen jumys isteıtin «Pangeos» qýatty muhıt tolqyndarynan jáne kún kózin qabyldaıtyn paneldermen jabylǵan shatyrdan alatyn kórinedi. Iá, búginde adam balasynyń qolynan kelmeıtin nárse qalmaı bara jatqan sıaqty.
Nur JAMAL