Abaı atyndaǵy qazaq ulttyq opera jáne balet teatry 90-shy mereıtoılyq maýsymyn ashty, dep habarlaıdy Almaty-akshamy.kz
2023 jyly 9 jáne 10 qyrkúıek Abaı atyndaǵy Qazaq ulttyq opera jáne balet teatrynyń tarıhqa toly 90-jyldyq mereıtoıynyń ashylýy ótti.
1934 jyly alǵash shymyldyǵyn ashqan Abaı atyndaǵy QazUOBT shaǵyn mýzykalyq stýdıadan bastaý alyp, Eýrazıa keńistigindegi eń úlken teatrǵa aınalyp, uzaq joldy bastan keshti, sol sebepten de «Qazaq óneriniń qara shańyraǵy» dep atalýy beker emes.
Teatr maýsymyn 9 qyrkúıek kúni dástúrden jańylmaı Ahmet Jubanov pen Latıf Hamıdıdiń «Abaı» operasymen ashty.
Basty partıalardy QR eńbek sińirgen qaıratkeri TALǴAT KÚZEMBAEV, VENERA ALPYSBAEVA, NURJAN BAJEKENOV, Esengeldi Rza, QR eńbek sińirgen qaıratkeri BOLAT BÓKENOV somdaıdy.
Al, 10 qyrkúıek klasıkalyq bı óneriniń sımvoly P. Chaıkovskııdiń «Aqqý kóli» baleti kórermen nazaryna usynyldy. Basty partıalardy Abaı at. QazUOBT jetekshi balet ártisteri MALIKA ELCHIBAEVA, NELSON PENÁ, AZAMAT ASQAROV somdady.
Mereıtoılyq maýsym mádenı ómirdegi qyzyqty ári mańyzdy oqıǵalarǵa toly bolady. Kórermenderdi birqatar premeralar, festıváldar men gastrólder kútýde. Aıta ketsek, qazan aıynyń 26-27 kúnderi Abaı atyndaǵy Qazaq ulttyq opera jáne balet teatry gastróldik saparmen Abaı eline, Semeı qalasynyń turǵyndary men qonaqtaryn óziniń qoıylymdarymen qýantpaq. Al, 21-22 qazanda teatr Sydyq Muhamedjanovtyń «Jumbaq qyz» epıkalyq operasynyń tusaýkeserin usynady, ol 1971 jyly sahnada alǵash ret qoıylǵan spektákldiń jańa baǵyttaǵy jańǵyrýynyń bir túri bolyp tabylady.
Abaı atyndaǵy Qazaq ulttyq opera jáne balet teatry - Qazaqstannyń ulttyq qazynasy men maqtanyshy, Qazaq opera jáne balet óneriniń altyn besigi elimizdiń jáne halqymyzdyń tarıhynyń altyn shejiresine máńgilikke endi, óıtkeni dál osy teatrdyń qurylýy qazaq mýzykasyndaǵy kóptegen mýzykalyq janrlardyń damýyna, kompozıtorlyq, vokaldyq, oryndaýshylyq, horeografıalyq janrlardyń qurylýyna qýatty túrtki boldy. Al teatr ǵımaratynyń qurylysy ulttyq arhıtektýranyń damýynda jańa kókjıekter ashty.
1934 jyldyń 13 qańtarynda ashylǵan alǵashqy kúnderinen bastap ol qazaq halqynyń úzdik dástúrlerin saqtaıtyn halyqqa qoljetimdi mýzykaly – sahnalyq alań retinde qalyptasty. 90 jyldyq tarıhynda teatrda 300-den astam shyǵarma qoıyldy. Bul qazaq operalary men baletterimen qatar, orys, batys Eýropa opera klasıkteriniń jaýharlary.