Murat Áýezovtiń 80 jasqa tolýyna oraı halyqaralyq ǵylymı konferensıa ótti
Áýez áýletiniń ǵana emes, Alashtyń amanatyn arqalaǵan Murat Áýezov bıyl seksenniń seńgirinde. Soǵan oraı, qara shańyraq QazUÝ-daǵy ál-Farabı kitaphanasynda memleket jáne qoǵam qaıratkeri, kórnekti qalamger, mádenıettanýshy ǵalym, dıplomat ári fılologıa ǵylymynyń doktory, profesor Murat Muhtarulynyń 80 jasqa tolýyna arnalǵan aýqymdy mádenı hám ǵylymı jıyn ótken bolatyn.
M.Áýezdiń mereıli jasyna arnalǵan «Tarıhı-mádenı úderistegi sabaqtastyq» atty halyqaralyq ǵylymı-tájirıbelik konferensıaǵa alys-jýyq shetelden birtalaı qonaq at arytyp kelip oı bólisti. Sol qatarda ǵalymnyń ǵylymdaǵy saptastary, ádebıettegi qalamdastary, ómirdegi jora-joldastary men otbasyndaǵy janashyr jaqyndary da boldy. Olar qadirli qaıratkerdi mereıtoıymen quttyqtap, ózderiniń júrekjardy lebizin arnady, ári eńbek jáne ómir jolyna aıryqsha baǵalaryn berdi.
Aýqymdy is-sharanyń resmı bólimin ál-Farabı atyndaǵy QazUÝ rektory Janseıt Túımebaev arnaıy quttyqtaý sózben ashty. Qaıratker ǵalymnyń ómiri men eńbek jolyna, atqarǵan abyroıly qyzmetterine joǵary baǵa bergen Janseıt Qanseıtuly sóziniń sońynda saltqa saı bilim ordasynyń atynan Murat Muhtarulynyń ıyǵyna shapan jaýyp, syı-sıapatyn tabystady. Alqaly toptyń aldynda TÚRKSOI halyqaralyq uıymynyń qoldaýymen jaryq kórgen Murat Muhtarulynyń túrik tilindegi «Birliktelik» (Birlik) kitabynyń tusaýy kesildi.
Budan keıin kezek tıgen qala ákimdiginiń ókili de soǵan uqsas iltıpatyn bildirdi. Syı-sıapattar osydan keıingi barlyq quttyqtaý sózderimen birge mereıtoı ıesiniń qolyna tabystaldy. Solardyń arasynda Tatarstan Jazýshylar odaǵynyń tóraǵasy Rkaıl Zaıdýllın tabystaǵan aıryqsha syılyq ta boldy. Mádenı-ádebı tarıhymyzda aıryqsha atalatyn áıgili «Qazan» baspasynda basylǵan «Quran-Kárimdi» tatar qalamgerleri atynan tabystaǵan Rkaıl Zaıdýllın óziniń ana tilinde, tebireniske toly baıandamasyn da jasady. «Rýhı áıdáman» dep atalǵan baıandamasynan baýyrlas ulttardyń ortaq úni, ystyq peıili ańqyp turdy.
Quttyqtaý sózdiń minberinde TÚRKSOI halyqaralyq uıymynyń bas hatshysy, qyrǵyz aǵaıyn atynan Sultan Raev, ózbek aǵaıyn atynan Safar Abdýllo, Nıderlandy jurtynan jetken kúıeý balasy Robert Ermers qatarly sheteldik qonaqtar, Marat Sembi syndy qatarlas qalamgerler de boldy.
Tús áletinen keıin sharanyń ǵylymı bólimi shymyldyq ashyp, «Tarıhı-mádenı úderistegi sabaqtastyq» taqyrybynda qos sesıadan turatyn talqylaý otyrysy ótti. Alǵashqy sesıany ǵalym ákeniń jolyn jalǵaǵan Áýezova Zıfa-Alýa Muratqyzy bastap ashty. Onda Reseı, Qyrǵyzstan, Ózbekstan, Nıderlandy, Túrkıa qatarly elderden jetken jáne otandyq zertteýshiler, shyǵystanýshy, mádenıettanýshy ǵalymdar qatysty. Olar M.Áýezovtiń ǵylymdaǵy, ádebıet pen ónerdegi jáne dıplomatıadaǵy eńbekterin túrli jaǵynan taldady.
Aıta keteıik, Murat Áýezovtiń mereıli 80 jasy qańtardan beri respýblıkamyz kóleminde atalyp ótip keledi.