Almatyda kondomınıým obektisiniń ortaq múlkin kútip ustaýǵa jumsalatyn shyǵyndardyń eń az mólsherin bekitý jónindegi máselelerdi talqylaǵan «Dóńgelek ústel» ótti.
İs-sharaǵa basqarýshy kompanıalar, PIK, MIB/JS, qoǵamdyq uıymdar jáne aýdandyq turǵyn úı-kommýnaldyq sharýashylyq bólimderi ókilderi, máslıhat depýtattary men qoǵamdyq keńes músheleri qatysty.
«Dóńgelek ústeldiń» maqsaty – kóppáterli turǵyn úılerdi basqarý jáne kútip ustaýdyń mınımaldy tarıfin qaıta qarap, talqylaý.
Alǵash sóz alǵan Almaty qalasy Komýnaldyq ınfraqurylym basqarmasy basshysynyń orynbasary Janat Jaqypbek tarıftik saıasatqa sońǵy ózgerister 14 jyldan astam ýaqyt buryn engizilgenine toqtalyp, biraq qazir jaǵdaı aıtarlyqtaı ózgergenin atap ótti.
– Almatyda sońǵy ret 2010 jyly ákimdik qaýlysymen 1 m² úshin 25 teńge mólsherinde bir jyl merzimge ortaq múlikti ustaýdyń eń tómengi tarıfi bekitilgen. Bul tarıf aýlany kútip ustaýǵa jáne kóp páterli turǵyn úılerdi kúrdeli jóndeýge jumsalǵan shyǵyndardy (MTQ) qamtydy. Alaıda, sodan beri jaǵdaı aıtarlyqtaı ózgerdi: qurylys materıaldarynyń baǵasy, jumysshylardyń jalaqysy, sondaı-aq turǵyn úı qyzmetteriniń sapasyna qoıylatyn talaptar ózgerdi, – deıdi basqarma ókili.
Ol sondaı-aq, bıyl jumys toby kondomınıým nysanyn basqarý jáne ortaq múlikti ustaý tarıfin eseptegenin atap ótti. Onyń aıtýynsha, shyǵyndardyń eń az mólsherin esepteý ádistemesine sáıkes kondomınıým obektisiniń ortaq múlkin basqarý jáne kútip-ustaý tarıfi ınflásıany eskere otyryp jyl saıyn qaıta qaralady.
Bul rette esepteýler ortasha jyldyq ınflásıa deńgeıin eskeredi, ol 6% quraıdy, bul ótken 14 jyldy eskere otyryp, tarıfterdi túzetý qajettiligin aıtarlyqtaı arttyrady. Sondaı-aq, qazirgi ýaqytta aýlalardy kútip-ustaý jumystary jergilikti búdjet esebinen júzege asyrylyp, kópqabatty turǵyn úılerdi kúrdeli jóndeýge jumsalatyn shyǵyndar jeke jınaq shotynan qarjylandyrylatynyn da atap ótken jón.
Almaty qalasy Turǵyn úı ınspeksıasy bóliminiń basshysy Dastan Maýsymbaevtyń aıtýynsha, turǵyn úıdi kútip ustaý boıynsha tarıfti belgileý statısıkaǵa baılanysty sheshiledi.
– Búgingi «Dóńgelek ústel» basyna jınalǵandaǵy maqsat – Almaty qalasy boıynsha eń tómengi mólsherde turǵyn úıdi kútip-ustaý shyǵyndaryn bekitý máselesi boldy. Qazirgi ýaqytta bul másele boıynsha qoǵamdyq keńes músheleri, basqarmanyń ókilderi barlyǵy birlese jumys jasap jatyr. Jaqyn arada bir kelisimge kelip, sheshim shyǵaratyn bolady. Máselen, qazir Astana qalasynda tarıf – 57 teńge, Qonaevta – 64 teńge bolyp bekitilgen. Ózderińiz bilesizder, Almaty – úlken turǵyn úı qory bar alyp megapolıs. Aldaǵy ýaqytta statısıkaǵa sáıkes Almaty qalasy boıynsha tarıftiń ortaq mólsheriniń qansha ekenin, eń tómengi mólsheri qansha bolatynyn eseptep, qorytyndy mámilege keledi, – deıdi D.Maýsymbaev.
«Dóńgelek ústel» basynda sóz alǵan Almatydaǵy PIK qaýymdastyǵynyń tóraǵasy Arkadıı Rýbsovtyń pikirinshe, búginde kóptegen nysandarda úılerdi durys kútip ustaý jáne olardyń qaýipsiz jumys isteýin qamtamasyz etý shyǵyndaryn ótemeıtin tarıfter bar.
– Almatyda tarıfter sońǵy on jylda kóterilmegen. Osy ýaqyt ishinde turǵyn úılerdi ustaý talaptary aıtarlyqtaı ózgerdi, materıaldar men qyzmetterge arnalǵan shyǵyndar ósti, basqarýshy kompanıalar úshin jańa mindetter paıda boldy. Máselen, turǵyndardyń qaýipsizdigin qamtamasyz etý jáne turǵyn úı qaýipsizdigi salasyndaǵy qosymsha standarttardy saqtaý, t.s.s. Bul ózgerister aǵymdaǵy tarıf deńgeıinde ótelmeıtin eleýli qosymsha shyǵyndardy talap etedi, – deıdi ol.
«Dóńgelek ústel» basyna jınalǵandar Qazaqstannyń basqa óńirlerindegi kópqabatty úılerdi basqarýdyń tarıfteri joǵary ekenin tilge tıek etti.
– Búgin tarıf saıasatyna baılanysty óte qyzý pikirtalas ótti. Men barlyq múddeli taraptardyń bul máselege beı-jaı qaramaı, turǵyn úılerge qatysty budan basqa da máseleler bar ekenin aıtyp, oı bóliskenderine qýanyshtymyn. Qazir Almatyda eń tómengi tarıf bar. Mamandar ony 56 teńgege deıin kóterýdi usynyp otyr. Durys dep esepteımin, – deıdi «Turan» PIK qaýymdastyǵynyń jetekshisi Bıbigúl Júnisbaeva.
«Dóńgelek ústelde» tarıfke ózgertý engizý Almatyǵa da qajet ekeni aıtyldy. Qalalyq Komýnaldyq ınfraqurylym basqarmasy basshysynyń orynbasary Janat Jaqypbek aldaǵy ýaqytta sarapshylardyń ıdeıalary tarıftik saıasatty túzetý boıynsha jańa usynystardy ázirleý kezinde muqıat qarastyrylyp, eskeriletinin atap ótti.
Aıta keteıik, kóppáterli úılerdi kútip-ustaý tarıfterin túzetý tek ekonomıkalyq qana emes, sonymen qatar azamattardyń ómir súrý sapasyna tikeleı áser etedi. Sondyqtan qarjylyq qoljetimdilik pen qyzmet kórsetý sapasyna áser etetin barlyq faktorlardy eskerý mańyzdy.
Jıyn sońynda uıymdastyrýshylar jergilikti atqarýshy organdardyń usynystaryn talqylap, ázirlegennen keıin qorytyndy daıyndalyp, odan ári qaraýǵa jáne sheshim qabyldaýǵa jiberiletinin aıtty.
Kerek keńes
Turǵyn úıdi kútip-ustaý tarıfi – bul kondomınıým obektisiniń ortaq múlkin kútip-ustaýǵa jáne basqarýǵa qajetti shyǵyndar úshin páter ıelerinen jınalatyn tólem mólsheri. Mamandardyń aıtýlarynsha, tarıftiń mólsheri zańnamaǵa, ortaq jınalys sheshimderine jáne úıdiń tehnıkalyq jaǵdaıyna baılanysty bekitiledi.