2025 jyldyń sońyna deıin Almatyda bilim ordalarynyń tapshylyǵy alty ese azaıady

Almaty qalasy óńirlik komýnıkasıalar qyzmetiniń alańynda qala ákiminiń orynbasary Beıbit Shahanovtyń qatysýymen bilim berý salasyndaǵy iske asyp jatqan jobalarǵa arnalǵan brıfıń ótti.
 
Ákim orynbasary Memleket basshysy Qasym-Jomart Toqaevtyń tapsyrmasyna sáıkes, úsh aýysymdy oqytýdy jáne synyptardyń shamadan tys tolýyn joıý – basty mindetterdiń biri ekenin atap ótti. Bul tikeleı bilim sapasy men oqýshylardyń jaılylyǵyna áser etedi, - dep habarlaıdy Aqshamnews.kz.
 
«Sapaly bilim berýge qolaıly jaǵdaı jasaý – strategıalyq maqsat. Ár bala qaýipsiz ári zamanaýı ortada oqýy úshin jańa oqý oryndaryn salyp, ǵımarattardy jańartyp jatyrmyz», – dedi spıker.
 
2025 jyly Almatyda barlyǵy 24 bilim nysanynyń qurylysy aıaqtaldy.
Prezıdent bastamasymen júzege asyp jatqan «Jaıly mektep» ulttyq jobasy aıasynda 22 500 oqýshy ornyna arnalǵan 12 jańa oqý mekemesi boı kóterdi. Onyń ishinde 7 bilim ordasy jańa oqý jylynyń basynda ashyldy.
 
Ashylǵan bilim mekemeleri qatarynda:
•        №217 – «Samǵaý» sh/a (2000 oryn),
•        №218 – «Qarasý» sh/a (2000 oryn),
•        №219 – «Terekti» sh/a (2000 oryn),
•        №214 – «Nurly dala» TK (1500 oryn),
•        №216 – Raıymbek dańǵyly, 210 (1500 oryn),
•        «Aqbulaq» shaǵyn aýdanyndaǵy oqý kesheni (1500 oryn),
•        №215 – Rozybakıev–Levıtan kósheleriniń qıylysy (1500 oryn)
bilim ordalary bar.
 
Ekinshi toqsanda «Quramys», «Shuǵyla», «Qaraǵaıly» shaǵyn aýdandarynda jáne C.Áshimov pen Egizbaev kóshelerindegi 5 zamanaýı oqý ordasy iske qosylady.
 
Sonymen qatar, jeke ınvestorlar esebinen 11,7 myń oqýshyǵa arnalǵan 8 oqý ǵımaratynyń qurylysy júrip jatyr. Bul bilim nysandaryn qala ákimdigi keıin satyp alyp, kelesi jyly paıdalanýǵa berý josparlanǵan.
 
Jańa oqý oryndary negizinen oqýshy orny jetispeıtin, turǵyn úı qurylysy qarqyndy júrip jatqan aýdandarda salynǵan. Bul – jańa formattaǵy, zamanaýı jabdyqtarmen qamtylǵan, balalarǵa barynsha qolaıly bilim keńistigi.
 
Budan bólek, Abaı Qunanbaıulynyń 180 jyldyǵyna oraı 900 oryndyq, jataqhanasy bar Abaı atyndaǵy mektep-ınternat salyndy. Sondaı-aq Alataý jáne Naýryzbaı aýdandarynda 890 oryndyq eki jańa oqý nysanynyń qurylysy jalǵasyp jatyr.
 
Beıbit Shahanovtyń aıtýynsha, qalada 17 bilim ordasynda qaýipsizdik pen sapany arttyrý maqsatynda rekonstrýksıa jáne seısmokúsheıtý jumystary júrgizilýde, al 5 oqý orny (№161, 33, 10, 189, 191) tolyq jańartyldy. Sonymen qatar 30 nysannyń jóndeý jobalary daıyndalýda, onyń 26-sy «Mektepterdi renovasıalaý» baǵdarlamasy aıasynda iske asyrylady.
 
Keshendi jumystardyń nátıjesinde 2025 jyldyń sońyna deıin Almatydaǵy oqýshy orny tapshylyǵy 34 myńnan 5–6 myńǵa deıin azaıady dep kútilýde.
 
Sonymen qatar ákim orynbasary balabaqsha qurylysy týraly aıtty. Bıyl №10 shaǵyn aýdanynda 160 oryndyq jańa balabaqsha ashyldy. Al «Jas Qanat», «Altyn Besik», «Shuǵyla», «Quramys», «Qaraǵaıly» aýdandarynda 1260 orynǵa arnalǵan taǵy 5 mektepke deıingi mekeme salynyp jatyr. 9 balabaqsha qaıta jóndelýde, sonyń ishinde «Orbıta-3» shaǵyn aýdanyndaǵy burynǵy ǵımarat jańartylyp, 480 oryndyq zamanaýı balabaqshaǵa aınaldy.
 
Taǵy 16 mektepke deıingi nysan boıynsha jobalyq-smetalyq qujattama daıyndalyp jatyr, onyń tórteýiniń qurylysy 2026 jyldyń alǵashqy toqsanynda bastalady.
 
Qalada qosymsha bilim berý ınfraqurylymyn damytýǵa da erekshe kóńil bólinýde. Bıyl Vahtangov kóshesinde kúnine 900 bala qabyldaı alatyn shyǵarmashylyq damý ortalyǵy salyndy. Al «Saıaly» shaǵyn aýdanynda 1350 oryndyq iri ortalyqtyń qurylysy júrip jatyr, ol 2026 jyldyń qyrkúıeginde aıaqtalady.
 
Qala ákiminiń orynbasary atap ótkendeı, «Jumysshy mamandyqtar jyly» aıasynda tehnıkalyq mamandyqtardyń bedelin arttyrý úshin qalada 1770 oryndyq jáne 418 jataqhana orny bar eki kolej salynyp jatyr. Olar telekomýnıkasıa, mashına jasaý jáne ınovasıalar baǵytyndaǵy mamandardy daıarlaıdy.