Tarazda Qazaqstan Premer-Mınıstri Álıhan Smaıylov pen Qyrǵyzstan Mınıstrler kabınetiniń tóraǵasy – Prezıdent Ákimshiliginiń Basshysy Aqylbek Japarovtyń qatysýymen qazaq-qyrǵyz Úkimetaralyq keńesiniń 11-shi otyrysy ótti, dep habarlaıdy Almaty-akshamy.kz
Shaǵyn jáne keńeıtilgen quramda ótken kelissózder barysynda taraptar ekijaqty yntymaqtastyqtyń ózekti máseleleri boıynsha pikir almasty.
Eki eldiń ortalyq memlekettik organdarynyń basshylary qatysqan Úkimetaralyq keńestiń negizgi taqyryptary saýda-ekonomıkalyq yntymaqtastyqty nyǵaıtý, sýdy paıdalaný jáne energetıka salasyndaǵy ózara is-qımyl, ónerkásip pen AÓK-te kooperasıalyq jobalardy iske asyrý, respýblıkalardyń tranzıttik-kólik áleýetin damytý, týrızm jáne mádenıet salalaryndaǵy birlesken bastamalar boldy.
Álıhan Smaıylov eki eldiń Memleket basshylarynyń kúsh-jigeriniń arqasynda sońǵy jyldary qazaq-qyrǵyz strategıalyq seriktestigi jańa serpinge ıe bolǵanyn atap ótti.
«Qyrǵyzstan biz úshin tatý kórshi, baýyrlas el ǵana emes, sondaı-aq mańyzdy saýda-ekonomıkalyq seriktes memleket bolyp tabylady», — dedi Úkimet basshysy.
Respýblıkalar arasynda ózara taýar aınalymy turaqty túrde ósýde. 2022 jyly saýda kólemi shamamen 19%-ǵa ulǵaıyp, $1,3 mlrd-qa jetti. Sonymen birge bıyl da oń dınamıka baıqalyp otyr: 7 aıda taýar aınalymy 13%-ǵa ósip, $757 mln-dy qurady.
Sonymen qatar Premer-Mınıstrdiń aıtýynsha, tranzıt, kólik, komýnıkasıa, týrızm jáne basqa salalarda yntymaqtastyq damyp keledi. Ónerkásiptik kooperasıa, aýyl sharýashylyǵy, sıfrlandyrý salalarynda jaqsy perspektıvalar bar.
Úkimet basshysynyń sózinshe, osy turǵyda birqatar mańyzdy birlesken jobany iske asyrýdy jedeldetý qajet. Atap aıtqanda, jaqyn arada shekara mańyndaǵy aýmaqtarda ındýstrıalyq saýda-logıstıkalyq keshen qurý jańa kooperasıalyq jobalardy júzege asyrýǵa yqpal etetin bolady. Bul sondaı-aq eki memleket basshylarynyń taýar aınalymyn $2 mlrd-qa deıin ulǵaıtý jónindegi tapsyrmasyna qol jetkizýge úlesin qosady.
Qazaqstan men Qyrǵyzstan Úkimetteriniń basshylary eki eldiń múddelerin eskere otyryp, ózara qurmet pen tatý kórshilikke negizdelgen sý salasyndaǵy tyǵyz ózara is-qımyldy jalǵastyrýǵa kelisti.
«Bizdiń halyqtarymyzdyń ómirine tikeleı áser etetin ekologıa jáne sýdy utymdy paıdalaný salasynda yntymaqtastyqty damytý asa mańyzdy bolyp tabylady. Sý resýrstaryn ádil jáne ashyq basqarýdy qamtamasyz etý maqsatynda bizge memleketaralyq sý sharýashylyǵy kanaldaryn sıfrlandyrý arqyly tıimdi monıtorıń júrgizý tetigi qajet. Gıdrologıalyq aqparat almasýdy, atap aıtqanda, sý qoımalaryna keletin aǵyn sý jáne baseın boıynsha sý alý jóninde aqparattarmen qamtamasyz etý mańyzdy», — dedi QR Premer-Mınıstri.
Úkimet basshysynyń pikirinshe, sý resýrstaryn birlesip paıdalanýdyń quqyqtyq tetigin jetildirý ózara tıimdi yntymaqtastyqty nyǵaıtýǵa yqpal etetin bolady.
Úkimet basshysy sondaı-aq mádenı-gýmanıtarlyq baılanystardyń da belsendi túrde damyp kele jatqanyn aıtty.
«Qazaqstannyń 2021 jyly Qyrǵyzstandaǵy, 2022 jyly Qyrǵyzstannyń Qazaqstandaǵy mádenıet kúnderi praktıkalyq jáne rýhanı baılanystardyń damýyna oń septigin tıgizdi», — dedi Álıhan Smaıylov.
Qyrǵyzstan Mınıstrler kabınetiniń tóraǵasy – Prezıdent Ákimshiliginiń Basshysy Aqylbek Japarov eki memleket basshylarynyń jýyrdaǵy ózara saparlary barysynda ekijaqty yntymaqtastyqtyń negizgi baǵyttary aıqyndalǵanyn eske saldy.
«Eki baýyrlas halyqtyń ıgiligi úshin ýaǵdalastyqtardy ilgeriletý maqsatynda barynsha kúsh salatynymyzǵa senimdimin», — dedi A. Japarov.
Kelissóz qorytyndysynda taraptar yntymaqtastyqtyń barlyq ózara tıimdi baǵyttary boıynsha belsendi is-qımyldy qoldaýǵa daıyn ekenderin rastady.