Taraz qalasynda qazaq kúresinen eresekter arasynda Qazaqstan Respýblıkasynyń chempıonaty ótip jatyr.
Jaqsylyq Úshkempirov atyndaǵy «Taraz-Arena» sport kesheninde ótip jatqan básekege Astana, Almaty jáne Shymkent qalalarynan, 17 oblystan kelgen 450-den astam balýan qatysýda, dep habarlaıdy aqshamnews.kz.
Jarystyń saltanatty ashylý rásimine QR Týrızm jáne sport mınıstri Erbol Myrzabosynov qatysyp, keıingi jyldary tól kúresimizdiń qarqyndy damyp kele jatqanyna, chempıonattyń mańyzdylyǵyna toqtaldy.
«Memleket basshysynyń qoldaýymen ulttyq sport túrleri qarqyndy damyp keledi. Sonyń ishinde ulttyq brendimiz – qazaq kúresiniń orny bólek. Atap aıtqanda, álemniń 40-tan astam elinde qazaq kúresi federasıalary jumys isteıdi. Tól kúresimiz jabyq ǵımarattaǵy Azıa oıyndarynyń, Dúnıejúzilik jekpe-jek oıyndarynyń baǵdarlamasyna endi. Balýandarymyz Astanada ótken 5-shi Dúnıejúzilik kóshpendiler oıyndarynda úzdik nátıje kórsetip, 12 altyn, 1 kúmis, 2 qola medal ıelendi. Sportshylarymyzdyń halyqaralyq dodalarda top jaryp, ult abyroıyn asqaqtatyp júrgeni biz úshin úlken maqtanysh! Búgingi jarysqa balýandarmen qatar jas sportshylardyń tájirıbesin jetildirip, salaýatty, belsendi ómir saltyn keńinen nasıhattap, óskeleń urpaqtyń qazaq kúresine degen qyzyǵýshylyǵyn arttyrady dep senemin», – dedi Erbol Myrzabosynov.
Bilekti balýandar básekesi KSRO-nyń jáne Qazaqstan Respýblıkasynyń eńbek sińirgen jattyqtyrýshysy, Jambyl oblysynyń Qurmetti azamaty Marat Nurmuhambetuly Jaqyttyń 80 jyldyq mereıtoıyna oraılastyrylyp otyr. Osy oraıda, Mınıstr sanaly ǵumyryn ulttyq kúreske arnaǵan Marat Nurmuhambetulyn quttyqtady. Marat Jaqyt – 20 jyl Qazaqstan, 10 jyl KSRO quramasyn basqaryp, sportqa zor eńbek sińirgen tulǵa. Ol jalpy 2 eńbek sińirgen sport sheberin, 25 halyqaralyq dárejedegi sport sheberin, 130 sport sheberin tárbıelegen. Aıta keteıik, balýandar el birinshiliginde 16 salmaq dárejesinde baq synap jatyr.