Almatyǵa «kele jatqan» esirtkiniń joly kesildi.
Jambyl oblysynyń turǵyny keptirilgen marıhýanany kólikpen Almatyǵa jetkizbek bolǵan, dep habarlaıdy Almaty-akshamy.kz Polisia.kz-ke silteme jasap.
Jedel aqparatty iske asyrý barysynda Shý aýdanynyń qumdy aımaǵynda asa iri mólsherde esirtki zattaryn saqtady degen kúdikpen 31 jastaǵy jergilikti turǵyn ustaldy.
Jedel-izdestirý sharalary esirtki bıznesine jáne nashaqorlyqqa qarsy kúrestiń 2023-2025 jyldarǵa arnalǵan keshendi jospary aıasynda Jambyl oblysynyń PD EQQİQB qyzmetkerleriniń QR İİM EQQİQD qyzmetkerlerimen birlesýimen júrgizildi. Jeke tintý kezinde ustalǵan adamnyń kúrtesiniń qaltasynan ósimdik tektes zattary bar polıetılen paket tabyldy.
Sondaı-aq aýmaqty tekserý barysynda jańadan orylǵan ósimdikterdiń úıindisi men kúdikti sol kúni jergilikti bazardan satyp alǵan oraq tabyldy. Saraptama qorytyndysyna sáıkes, anyqtalǵan zattar – jalpy salmaǵy 66 keli 400 gram keptirilgen marıhýana jáne jalpy salmaǵy 1 gram 65 mlgr gashısh esirtki zattary boldy. Ustalǵan azamattyń aıtýynsha, sol kúni kúdik týdyrmas úshin jáne dittegen jerine kózge túspeı jetý úshin týystarynan jylqy suraǵan. Ol esirtkini qumdy aýmaqqa jasyryp, birneshe kúnnen keıin kólikpen Almaty qalasyna alyp ketýdi josparlaǵan.
«Kúdikti óz kinásin tolyq moıyndady. Qazirgi tańda atalǵan derekke qatysty QR QK-niń 296-babynyń 4-bóligi (Asa iri mólsherdegi esirtki zattaryn saqtaý, tasymaldaý) boıynsha sotqa deıingi tergeý amaldary bastaldy. Bul baptyń sanksıasy 3 jyldan 7 jylǵa deıin bas bostandyǵynan aıyrýdy kózdeıdi», – dedi oblystyq PD EQQİQB bastyǵy Álim Bajyqbaev.