Jýrnalıs Mıhaıl Kozachkov uıymdasqan qylmystyq topqa kómektesken degen kúdikpen ustaldy
Qarjylyq monıtorıń agenttigi Mıhaıl Kozachkovty ustady, dep habarlaıdy Almaty-akshamy.kz agenttiktiń baspasóz qyzmetine silteme jasap.
Baspasóz qyzmetiniń málimetterine qaraǵanda, Mıhaıl Kozachkov Kospaevtyń uıymdasqan qylmystyq tobyna reıderlik basyp alýlar jasaýǵa kómektesken degen kúdik keltirilip otyr.
Qospaev pen onyń sybaılastary tanymal kásipkerlerdiń bıznesin tartyp alýy teris qoǵamdyq rezonans týdyratynyn túsinip, Kozachkovtyń qyzmetterin reıderlik basyp alý qurbandaryna aqparattyq shabýyl jasaý maqsatynda paıdalandy.
Óz kezeginde, Kozachkov quqyq qorǵaý organdarynda kóp jyldyq tájirıbesi bar dosy Býrhan Janseıitovti iri kólemdegi syıaqyǵa uıymdasqan qylmystyq top múshelerine sybaılastyq jasaýǵa tartty.
Sońǵysy óziniń burynǵy baılanystary arqyly uıymasqan qylmystyq toptyń qajettilikteri úshin, sonymen qatar keıin jarıalaýǵa arnalǵan aıyptaıtyn aqparattardy jınady.
Sonymen qatar, Janseıitov Kozachkovqa Telegramm-kanalyn moderasıalaýǵa kómektesti, atap aıtqanda, jýrnalısiń jarıalanymdarynyń astyna uıymdasqan qylmystyq toptyń basqa múshelerimen birigip, komentarıler ornalastyrý arqyly qoǵamdyq pikir qalyptastyrdy.
Posttarǵa jaǵymsyz pikirler qaldyrǵan jazbalardy óshirip, paıdalanýshylardy buǵattap otyrǵan.
Tergeý barysynda Janseıtov pen Kozachkovtyń óz qyzmetteri úshin uıymdasqan qylmystyq top múshelerinen 52 mln teńge syıaqy alǵany dáleldendi.
Kásipker Ábdiǵapparovtyń sheshesi Júnisbekovaǵa tıesili «Esentaı sıtı» jobasyndaǵy úlesti reıderlik basyp alý pıǵylyn iske asyrý úshin Kozachkov Ábdiǵapparovtyń bedelin túsiretin birqatar maqalalar jarıalady.
Bul rette jýrnalıs «Buqaralyq aqparat quraldary týraly» zań talaptaryn óreskel buzdy, óıtkeni keıbir jaǵdaılarda ol kórineý jalǵan málimetterdi, sondaı-aq banktik, otbasylyq jáne basqa da zańmen qorǵalatyn qupıaǵa qatysty derekterdi taratty.
Bıylǵy sáýirde kásipker Abdýllaev Kospaevtyń qylmystyq top múshesi – Shalın Rýslan tarapynan shyny ydystar shyǵaratyn zaýytty reıderlik basyp alý faktisi týraly jurtshylyqqa júgindi, olar zańdy menshik ıesin basqarýdan shettetýge tyrysty.
Jolǵa qoıylǵan sqema boıynsha, qylmystyq toptyń múddesi úshin áreket ete otyryp, Kozachkov zaýyt ıesiniń bedelin túsiretin birqatar maqala jarıalady. Bul rette Almaty oblysy turǵyndarynyń alkogól ónimimen ýlanýy jáne jábirlenýshiniń qasaqana kisi óltirýge qatysy bar ekendigi týraly kórineý jalǵan málimetter taratyldy.
2022 jyldyń shilde aıynyń basynda Qospaevtyń qylmystyq top músheleri qarjylyq monıtorıń organdary olardyń qylmystyq áreketterin áshkereleý boıynsha jedel is-sharalar men tergeý júrgizip jatqanyn quqyq qorǵaý organdaryndaǵy derekkózderi arqyly bilgen. Jasalǵan qylmystary úshin qylmystyq jaýapqa tartylýdan qorqyp, top músheleri Tanashev, Shalın, Kospaev Aıdos, Kozachkov pen Janseıitovtyń qatysýymen Eldos Kospaevtyń úılestirýimen tergeý organynyń bedelin túsirý jáne onyń jumysyna kedergi jasaý josparyn iske asyrdy.
Bıylǵy 12 shildede Almaty qalasynda Janseıitov uylmystyq toptyń belsendi múshesi - Aıdos Kospaevqa baqylaýdy júrgizgen jedel qyzmetkerlerdiń mashınasynyń jolyn buǵattady.
Aldyn ala daıyndalǵan senarı boıynsha advokattar men Kozachkov oqıǵa ornyna keldi, olar qorǵaýshylardy jasyryn baqylaýdy áshkerelegeni týraly jalǵan málimetterdi kópshilikke tarata bastady.
Bıllıng pen baqylaý kameralaryn qoldaný arqyly jedel mashınanyń sol kúni nemese aldyńǵy birneshe kúnde advokattardyń júrý baǵyty boıynsha múldem qıylyspaǵany senimdi túrde anyqtaldy.
Kozachkov naqty derekterdiń burmalanýymen baılanysty jaǵdaıdy qylmystyq top múddesi úshin qamtyp qana qoımaı, olardyń is-áreketterin sol jerde úılestirdi jáne Kospaev Aıdosqa baqylaýdan jasyrynýǵa múmkindik berdi. Nátıjesinde sońǵysy izdeýge jarıalandy.
Buryn habarlanǵandaı, óziniń jazaǵa tartylmaıtynyn sezgen Janseıitov, zańdy ashyq túrde taptap, buzaqylyq áreketter jasap, quqyq qorǵaý organy qyzmetkeriniń denesin qasaqana jaraqattaǵan.
Budan basqa, Kozachkovqa jáne basqa tulǵalarǵa qatysty memlekettik qupıalardy quraıtyn málimetterdi zańsyz jınaý jáne taratý faktileri boıynsha qylmystyq is tergelýde.
Qazirgi ýaqytta tergeý jalǵasýda, Kospaevtyń UQT músheleriniń basqa da qylmystarǵa qatysy bar-joǵy tekserilýde.
Aıta keteıik, buǵan deıin Qarjylyq monıtorıń agenttigi reıderlik jasady dep aıyptalǵan kúdikti Eldos Qospaev pen onyń senimdi tulǵalaryna qatysty tergeý bastalǵanyn jazǵan edik.