22 maýsymda Senat «Jol qozǵalysy týraly» QR Zańynyń jańa redaksıasyn maquldaǵan edi.
Al 29 maýsymda Prezıdent tıisti zańǵa qol qoıdy. Qujat alǵash resmı jarıalanǵannan 60 kún ótken soń, ıaǵnı 30 tamyzda kúshine enedi, dep habarlaıdy Almaty-akshamy.kz QazAqparatqa silteme jasap.
Endi keler aıdyń sońynan bastap elektr samokattardyń qozǵalysyna qatysty qoldanylýy múmkin sharalarǵa toqtalsaq.
Zańda kórsetilgendeı, eń joǵary jyldamdyǵy saǵatyna 25 kılometrden aspaıtyn kólik quraly «elektr samokat» dep tanylady. Olardyń qozǵalysy úshin de tıisti oryndar aıqyndalady. Sondaı-aq olardyń júrgizýshilerine tıisti shekteýler qoıylady.
Sharttar men erejelerdi saqtaı otyryp:
- elektr samokattardyń joldyń júris bóliginiń oń jaq shetimen qozǵalýyna ruqsat etiledi;
- júrgizýshi 18 jasqa tolǵan bolýy tıis;
- kólik quralyn basqarýǵa quqyq beretin kez kelgen sanattaǵy júrgizýshi kýáligi bolýy shart;
- shlem kıý mindetti.
- qarańǵy ýaqytta qozǵalý kezinde basqa kólik quraldarynyń júrgizýshilerine kórinýi úshin jaryq túsiretin belgiler ornatylýy qajet.
- trotýar nemese jaıaý júrginshiler jolymen saǵatyna 6 kılometrden aspaıtyn jyldamdyqpen júrý shart;
Erejeni buzǵan elektr samokat júrgizýshilerine Ákimshilik quqyq buzýshylyq kodeksine jáne Jol qozaǵalysy erejelerine saı jaza qoldanylady. Iaǵnı, talaptardy elemegenderdiń samokaty aıyp turaǵyna da qoıylýy múmkin.
Budan bólek, basqa quzyretti organda tirkelgen kólik quraldarynyń «Jol qozǵalysy týraly» Zańda kózdelgen talaptarǵa sáıkestigin tekserý úshin ishki ister organdary qyzmetkerleriniń kólik quraldaryn toqtatýynyń negizderin belgileıtin túzetýler engizildi.
Kólik quraldaryn memlekettik tirkeý týraly kýálikterdi, júrgizýshi kýálikterin jáne memlekettik tirkeý nómirlik belgilerin daıyndaý salasynda memlekettik monopolıa engizilmek. Bul qyzmet túrlerin júzege asyrý quqyǵy QR İİM janyndaǵy sharýashylyq júrgizý quqyǵyndaǵy respýblıkalyq memlekettik kásipornyna beriledi.