Nazarbaev Ýnıversıtetinde joǵary bilim men ǵylym salasyndaǵy halyqaralyq áriptestikti damytýǵa arnalǵan Rektorlar forýmy ótti. Jıynǵa Estonıa Prezıdenti Alar Karıs, Qazaqstan Respýblıkasynyń Ǵylym jáne joǵary bilim mınıstri Saıasat Nurbek, sondaı-aq Estonıanyń jetekshi ýnıversıtetteri rektorlary arnaıy qatysty, - dep habarlaıdy Aqshamnews.kz.
Forým aıasynda Qazaq ulttyq qyzdar pedagogıkalyq ýnıversıtetiniń Basqarma Tóraǵasy – Rektordyń mindetin atqarýshy Sábıt Sýataı men Tallın ýnıversıtetiniń rektory Týný Vıık ózara túsinistik týraly memorandýmǵa qol qoıdy.
Memorandým aıasynda taraptar mektepke deıingi jáne bastaýysh bilim berýge qatysty zamanaýı pedagogıkalyq tásilder men ózekti máselelerdi birlese zertteý úshin ortaq akademıalyq alań qurady. Sonymen qatar, yntymaqtastyq sıfrlyq tehnologıalar men jasandy ıntellektke negizdelgen ınovasıalyq bilim berý sheshimderin ázirleý men engizýdi qamtıdy. Taraptar uzaq merzimdi yntymaqtastyqty qamtamasyz etetin turaqty seriktestik jelisin qalyptastyrýdy kózdeıdi.
Akademıalyq yntymaqtastyqtyń bolashaq baǵyttaryn talqylaý barysynda QyzPU rektorynyń mindetin atqarýshy Sábıt Sýataı mektepke deıingi bilim berý júıesin damytýdaǵy birlesken bastamalardyń mańyzyn atap ótti.
«Búgingi talqylaýlar QyzPU men Tallın ýnıversıteti arasyndaǵy strategıalyq áriptestikti jańa deńgeıge kóteretinine senimdimin. Bizdiń birlesken bastamalarymyz mektepke deıingi bilim sapasyn arttyrýǵa eleýli úles qosady», – dedi ol.
Memorandýmǵa qol qoıý rásimi eki ýnıversıtet arasyndaǵy yntymaqtastyqtyń resmı bastamasy bolyp tabylady jáne bilim berý salasyndaǵy birlesken jobalardy damytýǵa jol ashady. Yntymaqtastyq aıasynda júrgiziletin zertteýler men tájirıbe almasý bilim berý sapasyn arttyrýǵa, zamanaýı pedagogıkalyq tásilderdi engizýge jáne sıfrlyq tehnologıalardy qoldaný arqyly ınovasıalyq sheshimderdi júzege asyrýǵa baǵyttalady.