2019 jyldan beri Túrkıa Prezıdenti Ákimshiliginiń Adam resýrstary basqarmasynyń úılestirýimen uıymdastyrylyp kele jatqan TalentforBIZ kareralyq is-sharalary álemniń 10 elinde 15 ret ótip, jumys berýshiler men jas mamandardy biriktirip keledi.
Bıylǵy jyly bul shara 2 qarashada Almatyda InterContinental Almaty qonaqúıinde ótedi. İs-shara tańǵy 09:00-den keshki 17:00-ge deıin jalǵasady, dep habarlaıdy aqshamnews.kz
Alǵashqy ret uıymdastyrylǵan sátten bastap, shara myńdaǵan jasqa jumysqa ornalasýǵa múmkindik berdi. Maqsaty – Qazaqstan jastaryn ǵalamdyq túrik kompanıalarymen tanystyryp, eki el stýdentteri men túlekterine jumysqa ornalasý, taǵylymdamadan ótý jáne bilim alý múmkindikterin keńeıtý.
Almatydaǵy TalentforBIZ aıasynda ártúrli salalarda qyzmet etetin jetekshi túrik kompanıalary, sonyń ishinde Turkish Airlines, Túrik aeroǵarysh ónerkásibi, Aselsan, Havelsan, Halk Bankası, Türk Telekom, sondaı-aq Qazaqstanda qyzmet kórsetip júrgen Abdi İbrahim, Esan Eczacıbaşı, Ziraat Bankası jáne Pro Yapı kompanıalary qatysady. Shara barysynda jas talanttar kompanıalardyń kadrlyq qyzmet basshylarymen tikeleı sóılesý múmkindigine ıe bolady. Kúni boıy kompanıa basshylary men adam resýrstary mamandary prezentasıalar, pikir almasýlar, aqparattyq sesıalar men suhbattar ótkizedi.
ADAM RESÝRSTARY SALASYNDAǴY YNTYMAQTASTYQ NYǴAIaDY
Túrkıanyń adam resýrstary salasyndaǵy tájirıbesi men jetistikteri Qazaqstanǵa berilip, eki el arasyndaǵy ózara is-qımyl kúsheıe túsýde. Bul úderis jastarǵa jumysqa ornalasý múmkindikterin usyna otyryp, Qazaqstandaǵy jumys berýshilerge bilikti kadrlarmen qamtamasyz etýdi jeńildetedi. Sonymen qatar, eki el arasyndaǵy bilim men tájirıbe almasý jas mamandardyń mansaptyq damýyna eleýli úles qosady. Adam resýrstary salasyndaǵy halyqaralyq yntymaqtastyqty nyǵaıtý maqsatynda bul is-shara Qazaqstannan keıin de ózge halyqaralyq ortalyqtarda jalǵasyn tabady.
BARLYQ ÚDERİSTER YETENEK KAPISI SIFRLYQ KARERALYQ PLATFORMASY ARQYLY JÚZEGE ASADY
TalentforBIZ is-sharalaryna tirkelý Túrkıanyń Yetenek Kapısı sıfrlyq kareralyq platformasy arqyly júzege asyrylady. Jastar is-sharaǵa tirkelip qana qoımaı, jumysqa qabyldaý jáne taǵylymdamaǵa ótý úshin suhbattarǵa ótinim bere alady. Qatysýshylar ózderiniń daǵdylaryn jumys berýshilerge barynsha jaqsy kórsetý úshin Yetenek Kapısı platformasyndaǵy profılderin tolyqtyryp, únemi jańartyp otyrýlary usynylady.
İs-shara týraly tolyq aqparatty talentforbiz.org resmı saıtynan jáne @talentforbiz áleýmettik jelilerinen tabýǵa bolady.